King Horn

	Cambridge MS



	Alle beon he bliþe
	þat to my song lyþe:
	A sang ihc schal ȝou singe
	Of Murry þe kinge.
5	King he was biweste
	So longe so hit laste.
	Godhild het his quen,
	Faire ne miȝte non ben.
	He hadde a sone þat het horn,
10	Fairer ne miste non beo born.
	Ne no rein vpon birine,
	Ne sunne vpon bischine:
	Fairer nis non þane he was,
	He was briȝt so þe glas,
15	He was whit so þe flur,
	Rose red was his colur.
	In none kinge riche
	Nas non his iliche.
	Twelf feren he hadde
20	Þat alle wiþ him ladde;
	Alle riche mannes sones
	& alle hi were faire gomes,
	Wiþ him for to pleie,
	& mest he luuede tweie;
25	Þat on him het haþulf child,
	& þat oþer ffikenild:
	Aþulf was þe beste
	& fikenylde þe werste.
	Hit was vpon a someres day,
30	Also ihc ȝou telle may,
	Murri þe gode king
	Rod on his pleing
	Bi þe se side,
	Ase he was woned ride:
35	He fond bi þe stronde
	ariued on his londe
	Schipes fiftene
	wiþ sarazins kene.
	He axede what isoȝte
40	Oþer to londe broȝte.
	A Payn hit ofherde
	& hym wel sone answarede:
	'Þi lond folk we schulle slon
	And alle þat Crist luueþ vpon
45	And þe selue riȝt anon,
	Ne schaltu todai henne gon.'
	Þe kyng aliȝte of his stede,
	For þo he hauede nede,
	& his gode kniȝtes two;
50	Al to fewe he hadde þo.
	Swerd hi gunne gripe
	& togadere smite;
	Hy smyten vnder schelde
	Þat sume hit yfelde.
55	Þe king hadde al to fewe
	Toȝenes so vele schrewe;
	So fele miȝten yþe
	Bringe hem þre to diþe.

	Þe pains come to londe
60	& neme hit in here honde:
	Þat folc hi gunne quelle
	& churchen for to felle.
	Þer ne moste libbe
	Þe fremde ne þe sibbe,
65	Bute hi here laȝe asoke
	& to here toke.
	Of alle wymmanne
	Wurst was godhild þanne;
	For Murri heo weop sore
70	& for horn ȝute more.
	He wenten vt of halle
	Fram hire Maidenes alle;
	Vnder a roche of stone,
	Þer heo liuede alone,
75	Þer heo seruede gode
	Aȝenes þe paynes forbode;
	Þer he seruede criste
	Þat no payn hit ne wiste:
	Eure heo bad for horn child
80	Þat Jesu crist him beo myld.
	Horn was in paynes honde
	Wiþ his feren of þe londe.
	Muchel was his fairhede,
	for ihesu crist him makede
85	Payns him wolde slen
	Oþer al quic flen,
	Ȝef his fairnesse nere,
	Þe children alle aslaȝe were.
	Þanne spak on Admirad,
90	Of wordes he was bald,
	'Horn, þu art wel kene,
	& þat is wel isene;
	Þu art gret & strong,
	fair & euene long;
95	Þu schalt waxe more
	Bi fulle seue ȝere:
	Ȝef þu mote to liue go
	& þine feren also,
	Ȝef hit so bi falle
100	Ȝe scholde slen vs alle:
	Þaruore þu most to stere,
	Þu & þine ifere;
	To schupe schulle ȝe funde
	& sinke to þe grunde,
105	Þe se ȝou schal adrenche,
	Ne schal hit us noȝt ofþinche;
	For if þu were aliue,
	Wiþ swerd oþer wiþ kniue,
	We scholden alle deie
110	& þi fader deþ abeie.'
	Þe children hi broȝte to stronde
	Wringinde here honde
	In to schupes borde
	At þe furste worde.
115	Ofte hadde horn beo wo
	At neure wurs þan him was þo.
	Þe se bigan to flowe
	& horn child to rowe;
	Þe se þat schup so fasste drof
120	Þe children dradde þerof.
	Hi wenden to wisse
	of here lif to misse,
	Al þe day & al þe niȝt,
	Til hit sprang dai liȝt

125	Til Horn saȝ on þe stronde
	Men gon in þe londe.
	'Feren' quaþ he 'ȝonge,
	Ihc telle ȝou tiþinge,
	Ihc here foȝeles singe
130	& þat gras him springe.
	Bliþe beo we on lyue,
	Vre schup is on ryue.'
	Of schup hi gunne funde
	& setten fout to grunde,
135	Bi þe se side
	hi leten þat schup ride.
	Þanne spak him child horn,
	In suddene he was iborn,
	'Schup, bi þe se flode
140	Daies haue þu gode:
	Bi þe se brinke
	No water þe nadrinke.
	Ȝef þu cume to Suddenne,
	Gret þu wel of myne kenne,
145	Gret þu wel my moder,
	Godhild quen þe gode;
	& seie þe paene kyng,
	Jesucristes wiþering,
	Þat ihc am hol & fer
150	On þis lond ariued her;
	And seie þat hei schal fonde
	Þe dent of myne honde.'
	Þe children ȝede to Tune
	Bi dales & bi dune.
155	Hy metten wiþ almair king,
	Crist ȝeuen him his blessing,
	King of Westernesse,
	Crist ȝiue him Muchel blisse.
	He him spac to horn child
160	Wordes þat were Mild:
	'Whannes beo ȝe, faire gumes,
	Þat her to londe beoþ icume,
	Alle þrottene
	Of bodie swiþe kene?
165	Bigod þat me makede,
	A swihc fair verade
	Ne sauȝ ihc in none stunde
	Bi westene londe:
	Seie me wat ȝe seche.'
170	Horn spak here speche,
	He spak for hem alle,
	vor so hit moste biualle;
	He was þe faireste
	& of wit þe beste.

175	'We beoþ of Suddenne,
	Icome of gode kenne,
	Of Cristene blode
	& kynges suþe gode.
	Payns þer gunne ariue
180	& duden hem of lyue:
	Hi sloȝen & todroȝe
	Cristenemen inoȝe.
	So crist me mote rede
	Vs he dude lede
185	In to a galeie,
	wiþ þe se to pleie,
	Dai hit is igon & oþer:
	Wiþute sail & roþer
	Vre schip bigan to swymme
190	To þis londes brymme.
	Nu þu miȝt vs slen & binde,
	Ore honde bihynde,
	Bute ȝef hit beo þi wille,
	Helpe þat we ne spille.'

195	Þanne spak þe gode kyng,
	Iwis he nas no Niþing:
	'Seie me, child, what is þi name,
	Ne schaltu haue bute game.'
	Þe child him answerde
200	Sone so he hit herde:
	'Horn ihc am ihote,
	Icomen vt of þe bote
	Fram þe se side:
	Kyng, wel mote þe tide.'
205	Þanne hym spak þe gode kyng,
	'Wel bruc þu þin euening,
	Horn þu go wel schulle
	Bi dales & bi hulle;
	Horn þu lude sune
210	Bi dales & bi dune,
	So schal þi name springe
	Fram kynge to kynge,
	& þi fairnesse
	Abute Westernesse,
215	Þe strengþe of þine honde
	In to Eurech londe:
	Horn, þu art so swete
	Ne may ihc þe forlete.'
	Hom rod Aylmar þe kyng
220	& horn mid him his fundyng
	& alle his ifere
	Þat were him so dere.

	Þe kyng com in to halle
	Among his kniȝtes alle:
225	Forþ he clupede aþelbrus,
	Þat was stiward of his hus:
	'Stiward, tak nu here
	Mi fundlyng for to lere
	Of þine mestere,
230	of wude & of riuere;
	& tech him to harpe
	Wiþ his nayles scharpe,
	Biuore me to kerue
	& of þe cupe serue;
235	Þu tech him of alle þe liste
	Þat þu eure of wiste,
	In his feiren þou wise
	In to oþere seruise:
	Horn þu vnderuonge
240	& tech him of harpe & songe.'

	Ailbrus gan lere
	Horn & his yfere:
	Horn in herte laȝte
	Al þat he him taȝte.
245	In þe curt & vte
	& elles al abute
	Luuede men horn child,
	& mest him louede Rymenhild,
	Þe kynges oȝene doster,
250	He was mest in þoȝte:
	Heo louede so horn child
	Þat neȝ heo gan wexe wild:
	For heo ne miȝte at borde
	Wiþ him speke no worde,
255	Ne noȝt in þe halle
	Among þe kniȝtes alle,
	Ne nowhar in non oþere stede:
	Of folk heo hadde drede:
	Bi daie ne bi niȝte
260	Wiþ him speke ne miȝte;
	Hire soreȝe ne hire pine
	Ne miȝte neure fine:
	In heorte heo hadde wo,
	& þus hire biþoȝte þo,
265	Heo sende hire sonde
	Aþelbrus to honde
	Þat he come hire to,
	& also scholde horn do
	Al in to bure,
270	ffor heo gan to lure;
	& þe sonde seide
	Þat sik lai þat maide,
	& bad him come swiþe,
	For heo nas noþing bliþe,
275	Þe stuard was in herte wo,
	For he nuste what to do;
	Wat Rymenhild hure þoȝte
	Gret wunder him þuȝte,
	Abute horn þe ȝonge
280	To bure for to bringe;
	He þoȝte vpon his mode
	Hit nas for none gode.
	He tok him anoþer,
	Athulf, hornes broþer.

285	'Aþulf,' he sede, 'riȝt anon
	Þu schalt wiþ me to bure gon,
	To speke wiþ Rymenhild stille
	& witen hure wille.
	In hornes ilike
290	þu schalt hure biswike:
	Sore ihc me ofdrede
	He wolde horn misrede.'
	Aþelbrus gan Aþulf lede
	& in to bure wiþ him ȝede.
295	Anon vpon Aþulf child
	Rymenhild gan wexe wild:
	He wende þat horn hit were
	þat heo hauede þere.
	Heo sette him on bedde;
300	Wiþ Aþulf child he wedde.
	On hire armes tweie
	Aþulf heo gan leie.
	'Horn,' quaþ heo, 'wel longe
	Ihc habbe þe luued stronge.
305	Þu schalt þi trewþe pliȝte
	On myn hond her riȝte
	Me to spuse holde,
	& ihc þe lord to wolde.'

	Aþulf sede on hire ire
310	So stille so hit were:
	'Þi tale nu þu lynne,
	For horn nis noȝt her inne.
	Ne beo we noȝt iliche:
	Horn is fairer & riche,
315	Fairer bi one ribbe
	Þane eni Man þat libbe:
	Þeȝ horn were vnder Molde
	Oþer elles wher he wolde
	Oþer henne a þusend Mile,
320	Ihc nolde him ne þe bigile.'

	Rymenhild hire biwente
	& Aþelbrus fule heo schente.
	'Hennes þu go, þu fule þeof,
	Ne wurstu me neure more leof;
325	Went vt of my bur
	Wiþ muchel mesauentur.
	Schame mote þu fonge
	& on hiȝe rode anhonge.
	Ne spek ihc noȝt wiþ horn
330	Nis he noȝt so vnorn;
	Hor is fairer þane beo he:
	Wiþ muchel schame mote þu deie.'

	Aþelbrus in a stunde
	Fel anon to grunde:
335	'Lefdi Min oȝe,
	Liþe me a litel þroȝe.
	Lust whi ihc wonde
	Bringe þe horn to honde.
	For horn is fair & riche,
340	Nis no whar his iliche:
	Aylmar þe gode kyng
	Dude him on mi lokyng;
	Ȝef horn were her abute,
	Sore y me dute
345	Wiþ him ȝe wolden pleie
	Bitwex ȝou selue tweie:
	Þanne scholde wiþuten oþe
	Þe kyng maken vs wroþe.
	Rymenhild, forȝef me þi tene,
350	Lefdi, my quene,
	& horn ihc schal þe fecche,
	Wham so hit recche.'

	Rymenhild ȝef he cuþe
	Gan lynne wiþ hire Muþe:
355	Heo makede hire wel bliþe;
	Wel was hire þat siþe:
	'Go nu,' quaþ heo, 'fone
	& send him after none,
	Whane þe kyng arise,
360	On a squieres wise,
	To wude for to pleie:
	Nis non þat him biwreie.
	He schal wiþ me bileue
	Til hit beo nir eue,
365	To hauen of him mi wille,
	After ne recchecche what me telle.'

	Aylbrus wende hire fro,
	Horn in halle fond he þo
	Bifore þe kyng on benche
370	Wyn for to schenche.
	'Horn,' quaþ he, 'so hende,
	To bure nu þu wende
	After mete stille
	Wiþ Rymenhild to duelle:
375	Wordes suþe bolde
	In herte þu hem holde:
	Horn, beo me wel trewe,
	Ne schal hit þe neure rewe.'
	Horn in herte leide
380	Al þat he him seide:
	He ȝeode in wel riȝte
	To Rymenhild þe briȝte,
	On knes he him sette
	& sweteliche hure grette.
385	Of his feire siȝte
	Al þe bur gan liȝte.
	He spac faire speche,
	Ne dorte him noman teche:
	'Wel þu sitte & softe,
390	Rymenhild þe briȝte,
	Wiþ þine Maidenes sixe
	Þat þe sitteþ nixte.
	Kinges stuard vre
	Sende me in to bure
395	Wiþ þe speke ihc scholde;
	Seie me what þu woldest,
	Seie & ihc schal here
	What þi wille were.'

	Rymenhild vp gan stonde
400	& tok him bi þe honde:
	Heo sette him on pelle
	Of wyn to drinke his fulle:
	Heo makede him faire chere
	& tok him abute þe swere.
405	Ofte heo him custe
	So wel so hire luste.
	'Horn,' heo sede, 'wiþute strif
	Þu schalt haue me to þi wif;
	Horn, haue of me rewþe
410	& plist me þi trewþe.'

	Horn þo him biþoȝte
	What he speke miȝte.
	'Crist,' quaþ he, 'þe wisse
	& ȝiue þe heuene blisse
415	Of þine husebonde
	Wher he beo in londe.
	Ihc am ibore to lowe
	Such wimman to knowe.
	Ihc am icome of þralle
420	& fundling bifalle.
	Ne feolle hit þe of cunde
	To spuse beo me bunde:
	Hit nere no fair wedding
	Bitwexe a þral & a king.'

425	Þo gan Rymenhild mis lyke
	& sore gan to sike:
	Armes heo gan buȝe,
	Adun he feol iswoȝe.

	Horn in herte was ful wo,
430	& tok hire on his armes two:
	He gan hire for to kesse
	Wel ofte mid ywisse.
	'Lemman,' he sede, 'dere,
	Þin herte nu þu stere.
435	Help me to kniȝte
	Bi al þine miȝte,
	To my lord þe king,
	Þat he me ȝiue dubbing.
	Þanne is mi þralhod
440	Iwent in to kniȝthod,
	& ischal wexe more
	& do, lemman, þi lore.'

	Rymenhild, þat swete þing
	Wakede of hire swoȝning:
445	'Horn,' quaþ heo, 'vel sone
	Þat schal beon idone:
	Þu schalt beo dubbed kniȝt
	Are come seue niȝt.
	Haue her þis cuppe
450	& þis Ryng þer vppe
	To Aylbrus & stuard,
	& se he holde foreward:
	Seie ihc him biseche
	Wiþ loueliche speche
455	Þat he adun falle
	Bifore þe king in halle,
	& bidde þe king ariȝte
	Dubbe þe to kniȝte.
	Wiþ seluer & wiþ golde
460	Hit wurþ him wel iȝolde.
	Crist him lene spede
	Þin erende to bede.'

	Horn tok his leue,
	For hit was neȝ eue.
465	Aþelbrus he soȝte
	& ȝaf him þat he broȝte,
	& tolde him ful ȝare
	Hu he hadde ifare,
	& sede him his nede,
470	& bihet him his mede.

	Aþelbrus also swiþe
	Wente to halle bliue:
	'Kyng,' he sede, 'þu leste
	A tale mid þe beste;
475	Þu schalt bere crune
	Tomoreȝe in þis tune;
	Tomoreȝe is þi feste:
	Þer bihoueþ geste.
	Hit nere noȝt for loren
480	For to kniȝti child horn,
	Þine armes for to welde,
	God kniȝt he schal ȝelde.'

	Þe king sede sone,
	'Þat is wel idone.
485	Horn me wel iquemeþ,
	God kniȝt him bisemeþ.
	He schal haue mi dubbing
	& afterward mi derling.
	& alle his feren twelf
490	He schal kniȝten him self:
	Alle he schal hem kniȝte
	Bifore me þis niȝte.'
	Til þe liȝt of day sprang
	Ailmar him þuȝte lang.
495	Þe day bigan to springe,
	Horn com biuore þe kinge
	Mid his twelf yfere:
	Sume hi were luþere.
	Horn he dubbede to kniȝte
500	Wiþ swerd & spures briȝte.
	He sette him on a stede whit:
	Þer nas no kniȝt hym ilik.
	He smot him a litel wiȝt
	& bed him beon a god kniȝt.

505	Aþulf fel aknes þar
	Biuore þe king Aylmar.
	'King,' he sede, 'so kene,
	Grante me a bene:
	Nu is kniȝ sire horn
510	Þat in suddenne was iboren:
	Lord he is of londe
	Ouer us þat bi him stonde:
	Þin armes he haþ & scheld
	To fiȝte wiþ vpon þe feld:
515	Let him vs alle kniȝte
	For þat is vre riȝte.'

	Aylmar sede sone ywis:
	'Do nu þat þi wille is.'
	Horn adun liȝte
520	& makede hem alle kniȝtes.
	Murie was þe feste
	Al of faire gestes:
	Ac Rymenhild nas noȝt þer
	& þat hire þuȝte seue ȝer.
525	After horn heo sente,
	& he to bure wente.
	Nolde he noȝt go one,
	Aþulf was his mone.
	Rymenhild on flore stod,
530	Hornes come hire þuȝte god,
	And sede, 'wescome, sire horn,
	& Aþulf kniȝt þe biforn.
	Kniȝt, nu is þi time
	For to fitte bi me:
535	Do nu þat þu er of spake,
	To þi wif þume take.
	Ef þu art trewe of dedes,
	Do nu ase þu sedes.
	Nu þu hast wille þine,
540	Vn bind me of my pine.'

	'Rymenhild,' quaþ he, 'beo stille;
	Ihc wulle don al þi wille.
	Also hit mot bitide,
	Mid spere ischal furst ride,
545	& mi kniȝthod proue,
	Ar ihc þe ginne to woȝe.
	We beþ kniȝtes ȝonge,
	Of odai al isprunge,
	& of vre mestere
550	So is þe manere
	Wiþ sume oþere kniȝte
	Wel for his lemman fiȝte,
	Or he eni wif take:
	For þi me stondeþ þe more rape.
555	Today, so crist me blesse,
	Ihc wulle do pruesse
	For þi luue in þe felde
	Mid spere & mid schelde:
	If ihc come to lyue
560	Ihc schal þe take to wyue.'

	'Kniȝt,' quaþ heo, 'trewe,
	Ihc wene ihc mai þe leue:
	Tak nu her þis goldring,
	God him is þe dubbing;
565	Þer is vpon þe ringe
	Igraue Rymenhild þe ȝonge.
	Þer nis non betere anonder sunne
	Þat eni man of telle cunne;
	For my luue þu hit were
570	& on þi finger þu him bere:
	Þe stones beoþ of suche grace
	Þat þu ne schalt in none place
	Of none duntes beon ofdrad,
	Ne on bataille beon amad,
575	Ef þu loke þeran
	& þenke vpon þi lemman.

	And sire Aþulf, þi broþer,
	He schal haue anoþer.
	Horn, ihc þe biseche,
580	Wiþ loueliche speche,
	Crist ȝeue god erndinge
	Þe aȝen to bringe.'

	Þe kniȝt hire gan kesse,
	& heo him to blesse:
585	Leue at hire he nam,
	& in to halle cam.
	Þe kniȝtes ȝeden to table,
	& horne ȝede to stable.
	Þar he tok his gode fole
590	Also blak so eny cole;
	Þe fole schok þe brunie
	Þat al þe curt gan denie,
	Þe fole bigan to springe,
	& horn murie to singe.
595	Horn rod in a while
	More þan a myle.
	He fond o schup stonde
	Wiþ heþene honde:
	He axede what hi soȝte
600	Oþer to londe broȝte.

	An hund him gan bihelde,
	Þat spac wordes belde:
	'Þis lond we wulleȝ wynne
	& sle þat þer is inne.'
605	Horn gan his swerd gripe,
	& on his arme wype;
	Þe sarazins he smatte
	Þat his blod hatte;
	At eureche dunte
610	Þe heued of wente.
	Þo gunne þe hundes gone
	Abute horn al one:
	He lokede on þe ringe,
	& þoȝte on rimenilde.
615	He sloȝ þer on haste
	On hundred bi þe laste
	Ne miȝte noman telle
	Þat folc þat he gan quelle:
	Of alle þat were aliue
620	Ne miȝte þer non þriue.
	Horn tok þe maisteres heued,
	Þat he hadde him bireued,
	& sette hit on his swerde
	Anouen at þan orde.
625	He verde hom in to halle
	Among þe kniȝtes alle.
	'Kyng,' he sede, 'wel þu sitte
	& alle þine kniȝtes mitte;
	To day, after mi dubbing,
630	So irod on mi pleing,
	Ifond o schup Rowe
	Þo hit gan to flowe,
	Al wiþ sarazines kyn,
	& none londisse Men,
635	To dai for to pine
	Þe & alle þine.
	Hi gonne me assaille,
	Mi swerd me nolde faille,
	Ismot hem alle to grunde
640	Oþer ȝaf hem diþes wunde.
	Þat heued i þe bringe
	Of þe maister kinge.
	Nu is þi wile iȝolde,
	King, þat þu me kniȝti woldest.'
645	A Moreȝe þo þe day gan springe
	þe king him rod an huntinge;
	At hom lefte ffikenhild,
	Þat was þe wurste moder child.
	Heo ferde in to bure
650	To sen auenture:
	Heo saȝ Rymenild sitte,
	Also he were of witte:
	Heo sat on þe sunne
	Wiþ tieres al birunne,
655	Horn sede, 'lef, þinore,
	Wi wepestu so sore?'
	Heo sede 'noȝt ine wepe,
	Bute ase ilay aslepe
	To þe se my net icaste,
660	& hit nolde noȝt ilaste;
	A gret fiss at þe furste
	Minet he gan to berste.
	Ihc wene þat ihc schal leose
	Þe fiss þat ihc wolde cheose.'

665	'Crist,' quaþ horn, '& seint steuene
	Turne þine sweuene.
	Ne schal iþe biswike,
	Ne do þat þe mislike.
	Ischal me make þinowe
670	To holden & to knowe
	For eureche oþere wiȝte,
	& þarto mi treuþe iþe pliȝte.'
	Muchel was þe ruþe
	Þat was at þare truþe:
675	For Rymenhild weop ille,
	& horn let þe tires stille.
	'Lemman,' quaþ he, 'dere
	Þu schalt more ihere;
	Þi sweuen schal wende,
680	Oþer sum Man schal vs schende.
	Þe fiss þat brak þe lyne
	Ywis he doþ us pine,
	Þat schal don vs tene,
	& wurþ wel sone isene.'

685	Aylmar rod bi sture,
	& horn lai in bure.
	Fykenhild hadde enuye
	& sede þes solye:
	'Aylmar, ihc þe warne,
690	Horn þe wule berne;
	Ihc herde whar he sede,
	& his swerd forþ leide,
	To bringe þe of lyue,
	& take Rymenhild to wyue.
695	He liþ in bure
	Vnder couerture
	By Rymenhild þi doȝter,
	& so he doþ wel ofte;
	And þider þu go al riȝt,
700	Þer þu him finde miȝt;
	Þu do him vt of londe,
	Oþer he doþ þe schonde.'

	Aylmar aȝen gan turne
	Wel Modi & wel Murne.
705	He fond horn in arme.
	On Rymenhilde barme
	'Awei vt,' he sede, 'fule þeof!
	Ne wurstu me neuremore leof.
	Wend vt of my bure
710	Wiþ muchel messauenture.
	Wel sone bute þu flitte,
	Wiþ swerde ihc þe anhitte.
	Wend vt of my londe
	Oþer þu schalt haue schonde.'

715	Horn sadelede his stede
	& his armes he gan sprede;
	His brunie he gan lace
	So he scholde in to place;
	His swerd he gan fonge,
720	Nabod he noȝt to longe.
	He ȝede forþ bliue
	To Rymenhild his wyue.
	He sede, 'Lemman derling,
	Nu hauestu þi sweuening.
725	Þe fiss þat þi net rente,
	Fram þe he me sente.
	Rymenhild, haue wel godne day,
	No leng abiden ine may.
	In to vncuþe londe,
730	Wel more for to fonde;
	Ischal wune þere
	Fulle seue ȝere.
	At seue ȝeres ende,
	Ȝef ine come ne sende,
735	Tak þe husebonde,
	ffor me þu ne wonde;
	In armes þu me fonge
	& kes me wel longe.'
	He custe him wel a stunde
740	& Rymenhild feol to grunde.
	Horn tok his leue,
	ne miȝte he no leng bileue;
	He tok Aþulf his fere
	Al abute þe swere,
745	& sede, 'kniȝt so trewe,
	Kep wel mi luue newe.
	Þu neure me ne forsoke;
	Rymenhild þu kep and loke
	His stede he gan bistride
750	& forþ he gan ride:
	To þe hauene he ferde,
	& a god schup he hurede,
	Þat him scholde londe
	In westene londe.

755	Aþulf weop wiþ iȝe
	& al þat him isiȝe.
	To lond he him sette
	& fot on stirop sette.
	He fond bi þe weie
760	Kynges sones tweie:
	Þat on him het harild,
	& þat oþer berild.
	Berild gan him preie
	Þat he scholde him seie,
765	What his name were
	& what he wolde þere.
	'Cutberd,' he sede, 'ihc hote,
	Icomen vt of þe bote,
	Wel feor fram biweste
770	To seche mine beste.'
	Berild gan him nier ride
	& tok him bi þe bridel;
	'Wel beo þu kniȝt ifounde!
	Wiþ me þu lef astunde:
775	Also mote i sterue,
	Þe king þu schalt serue;
	Ne saȝ i neure my lyue
	So fair kniȝt aryue.'
	Cutberd heo ladde in to halle,
780	& he a kne gan falle:
	He sette him a knewelyng
	& grette wel þe gode kyng.
	Þanne sede Berild sone:
	'Sire king, of him þu hast to done,
785	Bitak him þi lond to werie,
	Ne schat hit noman derie;
	For he is þe faireste man
	Þat eureȝut on þi londe cam.'

	Þanne sede þe king so dere:
790	'Welcome beo þu here.
	Go nu, Berild, swiþe,
	& make him ful bliþe;
	And whan þu farst to woȝe,
	Tak him þine gloue;
795	Iment þu hauest to wyue,
	Awai he schal þe dryue;
	For Cutberdes fairhede,
	Ne schal þe neure wel spede.'
	HIt was at Cristesmasse,
800	Neiþer more ne lasse;
	Þer cam in at none
	A Geaunt suþe sone,
	Iarmed fram paynyme,
	And seide þes ryme:
805	'Site stille, sire kyng,
	& herkne þis tyþyng:
	Her buþ paens ariued
	Wel mo þane fiue:
	Her beoþ on þe sonde,
810	King, vpon þi londe,
	On of hem wile fiȝte
	Aȝen þre kniȝtes:
	Ȝef oþer þre slen vre,
	Al þis lond beo ȝoure:
815	Ȝef vre on ouercomeþ ȝour þreo,
	Al þis lond schal vre beo.
	Tomoreȝe be þe fiȝtinge,
	Whane þe liȝt of daye springe.'

	Þanne sede þe kyng þurston:
820	'Cutberd schal beo þat on,
	Berild schal beo þat oþer,
	Þe þridde Alrid his broþer.
	For hi beoþ þe strengeste
	& of armes þe beste.
825	Bute what schal vs to rede?
	Ihc wene we beþ alle dede.'

	Cutberd sat at borde
	& sede þes wordes:
	'Sire king, hit nis no riȝte
830	On wiþ þ e to fiȝte,
	Aȝen one hunde
	Þre cristen men to fonde.
	Sire, ischal al one
	Wiþute more ymone
835	Wiþ mi swerd wel eþe
	Bringe hem þre to deþe.'

	Þe kyng aros amoreȝe
	Þat hadde muchel sorȝe.
	& Cutberd ros of bedde
840	Wiþ armes he him schredde;
	Horn his brunie gan on caste,
	& lacede hit wel faste,
	& cam to þe kinge
	At his vp risinge.
845	'King,' he sede, 'cum to fel
	For to bihelde
	Hu we fiȝte schulle,
	& togare go wulle.'
	Riȝt at prime tide
850	Hi gunnen vt ride,
	And funden on a grene
	A geaunt suþe kene,
	His feren him biside
	Hore deþ to abide.

855	Þe ilke bataille
	Cutberd gan assaille:
	He ȝaf dentes inoȝe,
	Þe kniȝtes felle iswoȝe.
	His dent he gan wiþdraȝe,
860	For hi were neȝ aslaȝe:
	& sede, 'kniȝtes, nu ȝe reste
	One while ef ȝou leste.'
	Hi sede hi neure nadde
	Of kniȝte dentes so harde;
865	He was of hornes kunne,
	Iborn in Suddenne.

	Horn him gan to agrise,
	& his blod arise.
	Biuo him saȝ he stonde
870	Þat driuen him of londe,
	& þat his fader sloȝ;
	To him his swerd he droȝ,
	He lokede on his rynge
	& þoȝte on Rymenhilde,
875	He smot him þureȝ þe herte,
	Þat sore him gan to smerte;
	Þe paens þat er were so sturne,
	Hi gunne awei vrne.
	Horn & his compaynye
880	Gunne after hem wel swiþe hiȝe,
	& sloȝen alle þe hundes
	Er hi here schipes funde.
	To deþe he hem alle broȝte,
	His fader deþ wel dere hi boȝte:
885	Of alle þe kynges kniȝtes
	Ne scapede þer er no wiȝte,
	Bute his sones tweie
	Bifore him he saȝ deie.
	Þe king bigan to grete
890	& teres for to lete:
	Me leiden hem in bare
	ȝ burden hem ful ȝare.

	Þe king com in to halle
	Among his kniȝtes alle.
895	'Horn,' he sede, 'iseie þe,
	Do as ischal rede þe.
	Aslaȝen beþ mine heirs,
	& þu art kniȝt of muchel pris,
	& of grete strengþe,
900	& fair o bodie lengþe.
	Mi Rengne þu schalt welde,
	& to spuse helde
	Reynild mi doȝter,
	Þat sitteþ on þe lofte.'

905	'O sire king, wiþ wronge
	Scholte ihc hit vnderfonge,
	Þi doȝter þat ȝe me bede,
	Ower rengne for to lede.
	Wel more ihc schal þe serue,
910	Sire kyng, or þu sterue;
	Þi sorwe schal wende
	Or seue ȝeres ende;
	Wanne hit is wente,
	Sire king, ȝef me mi rente:
915	Whanne i þi doȝter ȝerne
	Ne schaltu me hire werne.'
	Cutberd wonede þere
	Fulle seue ȝere,
	Þat to Rymenild he ne sente
920	Ne him self ne wente.
	Rymenild was in Westernesse
	Wiþ wel muchel sorinesse.

	A king þer gan ariue
	Þat wolde hire haue to wyue:
925	Aton he was wiþ þe king
	Of þat ilke wedding.
	Þe daies were schorte,
	Þat Rimenhild ne dorste
	Leten in none wise;
930	A writ he dude deuise,
	Aþulf hit dude write
	Þat horn ne luuede noȝt lite.
	Heo sende hire sonde
	To euereche londe,
935	To seche horn þe kniȝt
	Þer me him finde miȝte.
	Horn noȝt þer of ne herde,
	Til o dai þat he ferde
	To wude for to schete;
940	A knaue he gan imete.
	Horn seden, 'leue fere,
	Wat sechestu here?'
	'Kniȝt, if beo þi wille
	Imai þe sone telle.
945	Iseche fram biweste
	Horn of Westernesse,
	For a Maiden Rymenhild
	Þat for him gan wexe wild.
	A king hire wile wedde
950	& bringe to his bedde,
	King Modi of Reynes,
	On of hornes enemis.
	Ihc habbe walke wide
	Bi þe se side;
955	Nis he nowar ifunde:
	Walawai þe stunde!
	Wailaway þe while!
	Nu wurþ Rymenild bigiled.'
	Horn iherde wiþ his ires,
960	& spak wiþ bidere tires:
	'Knaue, wel þe bitide,
	Horn stondeþ þe biside;
	Aȝen to hure þu turne
	& seie þat heo ne murne,
965	For ischal beo þer bitime,
	A soneday bi pryme.'
	Þe knaue was wel bliþe
	& hiȝede aȝen bliue.
	Þe se bigan to þroȝe
970	Vnder hire woȝe.
	Þe knaue þere gan adrinke:
	Rymenhild hit miȝte ofþinke.
	Rymenhild vndude þe dure pin
	Of þe hus þer heo was in,
975	To loke wiþ hire iȝe
	If heo oȝt of horn isiȝe.
	Þo fond heo þe knaue adrent
	Þat he hadde for horn isent,
	& þat scholde horn bringe.
980	Hire fingres he gan wringe.

	Horn cam to þurston þe kyng.
	& tolde him þis tiþing.
	Þo he was iknowe
	Þat Rimenhild was his oȝe,
985	Of his gode kenne,
	Þe king of Suddenne,
	& hu he sloȝ in felde
	Þat his fader quelde.
	& seide: 'king þe wise,
990	Ȝeld me mi seruise,
	Rymenhild help me winne,
	Þat þu noȝt ne linne:
	& ischal do to spuse
	Þi doȝter wel to huse;
995	Heo schal to spuse haue
	Aþulf mi gode felaȝe,
	God kniȝt mid þe beste
	& þe treweste.'
	Þe king sede so stille:
1000	'Horn, haue nu þi wille.'
	He dude writes sende
	In to yrlonde
	After kniȝtes liȝte,
	Irisse men to fiȝte.
1005	To horn come inoȝe,
	Þat to schupe droȝe.
	Horn dude him in þe weie
	On a god Galeie.
	Þe him gan to blowe
1010	In alitel þroȝe.
	Þe se bigan to posse
	Riȝt in to Westernesse.
	Hi strike seil & maste
	& Ankere gunne caste.
1015	Or eny day was sprunge
	Oþer belle irunge
	Þe word bigan to springe
	Of Rymenhilde weddinge.
	Horn was in þe watere,
1020	Ne miȝte he come no latere.
	He let his schup stonde,
	& ȝede to londe.
	His folk he dude abide
	Vnder wude side:
1025	Hor him ȝede alone,
	Also he sprunge of stone.
	A palmere he þar mette,
	& faire hine grette:
	'Palmere, þu schalt me telle
1030	Al of þine spelle.'
	He sede vpon his tale:
	'I come fram o brudale;
	Ihc was at o wedding
	Of a Maide Rymenhild:
1035	Ne miȝte heo adriȝe
	Þat heo ne weop wiþ iȝe:
	Heo sede þat heo nolde
	Ben ispused wiþ golde,
	Heo hadde on husebonde
1040	Þeȝ he were vt of londe.
	& in strong halle,
	Biþinne castel walle,
	Þer iwas atte ȝate,
	Nolde hi me in late.
1045	Modi ihote hadde
	To bure þat me hire ladde.
	Awai igan glide,
	Þat deol inolde abide.
	Þe bride wepeþ sore,
1050	& þat is muche deole.'

	Quaþ horn: 'so crist me rede,
	We schulle chaungi wede:
	Haue her cloþes myne,
	& tak me þi sclauyne.
1055	Today ischal þer drinke
	Þat some hit schulle ofþinke.'
	His sclauyn he dude dun legge,
	& tok hit on his rigge:
	He tok horn his cloþes,
1060	Þat nere him noȝt loþe.
	Horn tok burdon & scrippe,
	& wrong his lippe.
	He makede him a ful chere
	& al bicolmede his swere.
1065	He makede him vn bicomelich,
	Hes he nas neuremore ilich.

	He com to þe gateward
	Þat him answerede hard.
	Horn bad vndo softe
1070	Mani tyme & ofte;
	Ne miȝte he awynne
	Þat he come þerinne.
	Horn gan to þe ȝate turne
	& þat wiket vnspurne;
1075	Þe boye hit scholde abugge,
	Horn þreu him ouer þe brigge,
	Þat his ribbes him to brake,
	& suþþe com in atte gate.
	He sette him wel loȝe
1080	In beggeres rowe;
	He lokede him abute,
	Wiþ his colmie snute.
	He seȝ Rymenhild sitte
	Ase heo were of witte
1085	Sore wepinge & ȝerne:
	Ne miȝte hure noman wurne.
	He lokede in eche halke,
	Ne seȝ he nowhar walke
	Aþulf his felawe,
1090	Þat he cuþe knowe.
	Aþulf was in þe ture
	Abute for to pure
	After his comynge,
	Ȝef schup him wolde bringe.
1095	He seȝ þe se flowe
	& horn nowar rowe.
	He sede vpon his songe:
	'Horn, nu þu ert wel longe.
	Rymenhild þu me toke
1100	Þat ischolde loke.
	Ihc habbe ikept hure eure:
	Com nu oþer neure.
	Ine may no leng hure kepe,
	For soreȝe nu y wepe.'

1105	Rymenhild Ros of benche
	Wyn for to schenche,
	After mete in sale,
	boþe wyn & ale.
	On horn he bar anhonde,
1110	So laȝe was in londe.
	Kniȝtes & squier
	Alle dronken of þe ber.
	Bute horn alone
	Nadde þerof no mone.
1115	Horn sat vpon þe grunde,
	Him þuȝte he was ibunde.
	He sede: 'quen so hende,
	Tomeward þu wende;
	Þu ȝef vs wiþ þe furste,
1120	Þe beggeres beoþ ofþurste.'

	Hure horn heo leide adun
	& fulde him of a brun
	His bolle of a galun,
	For heo wende he were a glotoun.
1125	He seide: 'haue þis cuppe
	& þis þing þer vppe.
	Ne saȝ ihc neure, so ihc wene,
	Beggere þat were so kene.
	Horn tok hit his ifere,
1130	& sede: 'quen so dere,
	Wyn nelle ihc Muche ne lite
	Bute of cuppe white.
	Þu wenest ibeo a beggere,
	& ihc am a fissere,
1135	Wel feor icome bi este
	For fissen at þi feste:
	Mi net liþ her bi honde,
	Bi a wel fair stronde,
	Hit haþ ileie þere
1140	Fulle seue ȝere.
	Ihc am icome to loke
	Ef eni fiss hit toke.
	Ihc am icome to fisse:
	Drink to me of disse,
1145	Drink to horn of horne:
	Feor ihc am i orne.'
	Rymenhild him gan bihelde,
	Hire heorte bigan to chelde.
	Ne kneu heo noȝt his fissing,
1150	Ne horn hym selue noþing:
	Ac wunder hire gan þinke
	Whi he bad to horn drinke.
	Heo fulde hire horn wiþ wyn
	& dronk to þe pilegrym.
1155	Heo sede: 'drink þi fulle,
	& suþþe þu me telle
	If þu eure isiȝe
	?Horn? vnder wude liȝe.'
	Horn dronk of horn a stunde
1160	& þreu þe ring to grunde.
	Þe quen ȝede to bure
	Wiþ hire maidenes foure.
	Þo fond heo what heo wolde,
	A ring igrauen of golde
1165	Þat horn of hure hadde;
	Sore hure dradde
	Þat horn isteue were,
	For þe Ring was þere.
	Þo sente heo a damesele
1170	After þe palmere;
	'Palmere,' quaþ heo, 'trewe,
	Þe ring þat þu þrewe,
	Þu seie whar þu hit nome,
	& whi þu hider come.'
1175	He sede: 'bi seint gile,
	Ihc habbe go mani Mile,
	Wel feor bi ȝonde weste,
	To seche my beste.
	Ifond horn child stonde
1180	To schupeward in londe.
	He sede he wolde agesse
	To ariue in westernesse.
	Þe schip nam to þe flode
	Wiþ me & horn þe gode;
1185	Horn was sik & deide,
	& faire he me preide:
	"Go wiþ þe ringe
	To Rymenhild þe ȝonge."
	Ofte he hit custe;
1190	God ȝeue his saule reste.'

	Rymenhild sede at þe furste:
	'Herte nu þu berste,
	For horn nastu namore
	Þat þe haþ pined þe so sore.'
1195	Heo feol on hire bedde,
	Þer heo knif hudde,
	To sle wiþ king loþe
	& hure selue boþe,
	In þat vlke niȝte,
1200	If horn come ne miȝte.
	To herte knif heo sette,
	Ac horn anon hire kepte.
	He wipede þat blake of his swere
	& sede: 'quen so swete & dere,
1205	Ihc am horn þinoȝe,
	Ne canstu me noȝt knowe?
	Ihc am horn of westernesse,
	In armes þu me cusse.'
	Hi custe hem mid ywisse,
1210	& makeden Muche blisse.

	'Rymenhild,' he sede, 'ywende
	Adun to þe wudes ende;
	Þer beþ myne kniȝtes
	Redi to fiȝte,
1215	Iarmed vnder cloþe;
	Hi schulle make wroþe
	Þe king & his geste,
	Þat come to þe feste:
	Today ischal hem teche
1220	& sore hem areche.'

	Horn sprong vt of halle
	& let his sclauin falle.
	Þe quen ȝede to bure
	& fond aþulf in ture.
1225	'Aþulf,' heo sede, 'be bliþe,
	And to horn þu go wel swiþe.
	He is vnder wude boȝe,
	& wiþ him kniȝtes Inoȝe.'

	Aþulf bigan to springe
1230	For þe tiþinge.
	After horn he arnde anon
	Also þat hors miȝte gon:
	He him ouertok ywis,
	Hi makede suiþe Muchel blis.
1235	Horn tok his preie
	& dude him in þe weie.
	He com in wel sone,
	Þe ȝates were vndone,
	Iarmed ful þikke
1240	Fram fote to þe nekke.
	Alle þat were þerin,
	Biþute his twelf ferin
	& þe king Aylmare,
	He dude hem alle to kare.
1245	Þat at þe feste were,
	Here lif hi lete þere.
	Horn ne dude no wunder
	Of ffikenhildes falfe tunge.
	Hi sworen oþes holde
1250	Þat neure ne fcholde
	Horn neure bitraie,
	Þeȝ he at diþe laie.
	Hi Runge þe belle
	Þe wedlak for to felle.
1255	Horn him ȝede with his
	To þe kinges palais.
	Þer was brid & ale fuete,
	For riche men þer ete.
	Telle ne miȝte tunge
1260	Þat gle þat þer was funge.

	Horn fat on chaere
	& bad hem alle ihere.
	'King,' he fede, 'þu lufte
	A tale mid þe befte.
1265	Ine feie hit for no blame,
	Horn is mi name.
	Þume to kniȝte houe,
	& kniȝthod haue proued.
	To þe king men feide
1270	Þat iþe bitraide:
	Þu makedeft me fleme
	& þi lond to reme:
	Þu wendeft þat iwroȝte
	Þat y neure ne þoȝte,
1275	Bi Rymenhild for to ligge,
	& þat i wiþ fegge.
	Ne fchal ihc hit biginne,
	Til i fuddene winne.
	Þu kep hure a ftunde,
1280	Þe while þat ifunde
	In to min heritage
	& to mi baronage.
	Þat lond ischal ofreche
	& do mi fader wreche.
1285	Ischal beo king of tune
	& bere kinges crune,
	Þanne schal Rymenhilde
	Ligge bi þe kinge.'

	Horn gan to schupe draȝe
1290	Wiþ his yrisse felaȝes,
	Aþulf wiþ him his brother,
	Nolde he non oþer.
	Þat schup bigan to crude,
	Þe wind him bleu lude.
1295	Biþinne daies fiue
	Þat schup gan ariue.
	Abute middelniȝte
	Horn him ȝede wel riȝte.
	He tok aþulf bi honde
1300	& vp he ȝede to londe.
	Hi founde vnder schelde
	A kniȝt hende in felde.
	Þe kniȝt him aslepe lay
	Al biside þe way.
1305	Horn him gan to take
	& sede: 'kniȝt, awake.
	Seie what þu kepest,
	& whi þu her slepest;
	Me þinkþ biþine crois liȝte
1310	Þat þu longest to vre driȝte.
	Bute þu wule me schewe,
	Ischal þe to hewe:'
	Þe gode kniȝt vp aros,
	Of þe wordes him gros.
1315	He sede: 'ihc haue aȝenes my wille
	Payns ful ylle.
	Ihc was cristene a while;
	Þo icom to þis ille
	Sarazins blake
1320	Þat dude me forsake.
	On crist ihc wolde bileue,
	On him hi makede me reue,
	To kepe þis passage
	Fram horn þat is of age,
1325	Þat wunieþ bieste,
	Kniȝt wiþ þe beste:
	Hi sloȝe wiþ here honde
	Þe king of þis londe,
	& wiþ him fele hundred,
1330	& þerof is wunder
	Þat he ne comeþ to fiȝte.
	God sende him þe riȝte,
	& wind him hider driue,
	To bringe hem of liue.
1335	Hi sloȝen kyng Murry,
	Hornes fader king hendy,
	Horn hi vt of londe sente;
	Tuelf felaȝes wiþ him wente,
	Among hem aþulf þe gode,
1340	Min oȝene child, my leue fode:
	Ef horn child is hol & sund,
	& Aþulf biþute wund,
	He luueþ him so dere,
	& is him so stere,
1345	Miȝte iseon hem tueie,
	For ioie ischolde deie.'

	'Kniȝt beo þanne bliþe
	Mest of alle siþe;
	Horn & Aþulf his fere
1350	Boþe hi ben here.'
	To horn he gan gon
	& grette him anon.
	Muche ioie hi makede þere
	Þe while hi togadere were.
1355	'Childre,' he sede, 'hu habbe ȝe fare?
	Þat ihc ȝou seȝ hit is ful ȝare.
	Wulle ȝe þis lond winne
	& sle þat þeris inne?'
	He sede: 'leue horn child,
1360	Ȝut lyueþ þi moder Godhild:
	Of ioie heo miste
	If heo þe aliue wiste.'

	Horn sede on his rime:
	'Iblessed beo þe time,
1365	Icom to Suddenne
	Wiþ mine irisse menne:
	We schulle þe hundes teche
	To speken vre speche.
	Alle we hem schulle sle
1370	& al quic hem fle.'
	Horn gan his horn to blowe,
	His folk hit gan iknowe,
	Hi comen vt of stere,
	Fram hornes banere:
1375	Hi sloȝen & fuȝten,
	Þe niȝt & þe vȝten:
	Þe sarazins cunde
	ne lefde þer non in þende.
	Horn let wurche
1380	chapeles & chirche.
	He let belles ringe,
	& Masses let singe.
	He com to his Moder halle
	In a roche walle.
1385	Corn he let serie
	& makede feste merie.
	Murie lif he wroȝte:
	Rymenhild hit dere doȝte.

	ffikenhild was prut on herte,
1390	& þat him dude smerte.
	Ȝonge he ȝaf & elde
	Mid him for to helde.
	Ston he dude lede
	Þer he hopede spede.
1395	Strong castel he let sette,
	Mid séé him biflette.
	Þer ne miȝte liȝte
	Bute foȝel wiþ fliȝte.
	Bute whanne þe se wiþ droȝe
1400	Miȝte come men ynoȝe.
	ffikenhild gan wende
	Rymenhild to schende.
	To woȝe he gan hure ȝerne,
	Þe kyng ne dorste him werne.
1405	Rymenhild was ful of mode,
	He wep teres of blode.
	Þat niȝt horn gan swete,
	& heuie forto mete
	Of Rymenhild his make,
1410	Into schupe was itake:
	Þe schup bigan to blenche,
	His lemman scholde adrenche.
	Rymenhild wiþ hire honde
	Wolde vp to londe.
1415	ffikenhild aȝen hire pelte
	Wiþ his swerdes hilte.

	Horn him wok of slape
	So aman þat hadde rape.
	'Aþulf,' he fede, 'felaȝe,
1420	To schupe we mote draȝe;
	ffikenhild me haþ idon vnder
	& Rymenhild to do wunder.
	Crist for his wundes fiue
	To niȝt me þuder driue.'
1425	Horn gan to schupe Ride,
	His feren him biside.
	ffikenhild or þe dai gan springe
	Al riȝt he ferde to þe kinge,
	After Rymenhild þe briȝte,
1430	To wedden hire biniȝte.
	He ladde hure bi þe derke
	In to his nywe werke;
	Þe feste hi bigunne
	Er þat ros þe funne;
1435	Er þane horn hit wiste,
	Tofore þe sunne vpriste,
	His schup stod vnder ture
	At Rymenhilde bure.
	Rymenhild litel weneþ heo
1440	Þat horn þanne aliue beo.
	Þe castel þei ne knewe,
	For he was so nywe.
	Horn fond sittinde Arnoldin
	Þat was Aþulfes cosin
1445	Þat þer was in þat tide
	horn for tabide.
	'Horn kniȝt,' he fede, 'kinges sone,
	Wel beo þu to londe icome:
	Today haþ ywedde fikenhild
1450	Þi swete lemman Rymenhild.
	Ne schal iþe lie,
	He haþ giled þe twie
	Þis tur he let make
	Al for þine sake,
1455	Ne mai þer come inne
	Noman wiþ ? none ? ginne.
	Horn, nu crist þe wisse
	Of Rymenhild þat þu ne misse.'

	Horn cuþe al þe liste
1460	Þat eni man of wiste.
	Harpe he gan schewe
	& tok selaȝes fewe,
	Of kniȝtes suiþe snelle
	Þat schrudde hem at wille.
1465	Hi ȝeden bi þe grauel
	Toward þe castel:
	Hi gunne murie singe
	& makede here gleowinge.

	Rymenhild hit gan ihere
1470	& axede what hi were.
	Hi sede: 'hi weren harpurs,
	& sume were gigours.'
	He dude horn in late
	Riȝt at halle gate;
1475	He sette him on þe benche
	His harpe for to clenche.
	He makede Rymenhilde lay,
	& heo makede walaway.
	Rymenhild feol yswoȝe,
1480	Ne was þer non þat louȝe.
	Hit smot to hornes herte
	So bitere þat hit smerte.
	He lokede on þe ringe
	& þoȝte on Rymenhilde.
1485	He ȝede vp to borde
	Wiþ gode suerdes orde.
	ffikenhildes crune
	Þer ifulde adune,
	& Al his men a rowe
1490	Hi dude adun þrowe.
	Whanne hi weren aslaȝe,
	Fikenhild hi dude todraȝe.
	Horn makede Arnoldin þare
	King after king Aylmare,
1495	Of al westernesse
	For his meoknesse.
	Þe king & his homage
	Ȝeuen Arnoldin trewage.

	Horn tok Rymenhild bi þe honde
1500	& ladde hure to þe stronde,
	& ladde wiþ him Aþelbrus,
	Þe gode stuard of his hus.
	Þe se bigan to flowe
	& horn gan to Rowe.
1505	Hi gunne for ariue
	Þer king modi was sire.
	Aþelbrus he makede þer king
	For his gode teching:
	He ȝaf alle þe kniȝtes ore
1510	For horn kniȝtes lore.
	Horn gan for to ride,
	Þe wind him bleu wel wide.
	He ariuede in yrlonde.
	Þer he wo fondede,
1515	Þer he dude Aþulf child
	Wedden maide Reynild.
	Horn com to suddenne
	Among al his kenne.
	Rymenhild he makede his quene,
1520	So hit miȝte wel beon.
	Al folk hem miȝte rewe
	Þat loueden hem so trewe.
	Nu ben hi boþe dede;
	Crist to heuene hem lede!
1525	Her endeþ þe tale of horn,
	Þat fair was & ? noȝt ? vnorn;
	Make we vs glade Eure among,
	For þus him endeþ hornes song.
	Jesus þat is of heuene king
1530	Ȝeue vs alle his suete blessing! Amen.

	EX-PLI-CIT.

	Laud MS



	Alle ben he bliþe
	Þat to me wilen lythe!
	A song ich wille you singe
	Of morye þe kinge.
5	King he was bi westen
	Wel þe his dayes lesten.
	And godhild his gode quen;
	Feyrer non micte ben.
	Here sone hauede to nome orn;
10	Fairer child ne micte ben born,
	Ne reyn ne micte upon reyne,
	Ne no sonne bi schyne.
	Fayrer child þanne he was:
	Brict so euere any glas;
15	Whit so any lili flur;
	So rose red was his colur.
	He was fayr and eke bold,
	And of fiftene winter hold.
	Was noman him yliche
20	Bi none kinges riche.
	Xii. feren he hadde
	Þat he mid him ladde,
	And alle riche kinges sones,
	And alle swiþe faire gomes,
25	Mid him for to pleie,
	But mest he louede tueye;
	Þat on was hoten ayol child,
	And þat oþer fokenild.
	Athulf wes þe beste,
30	Ant fykenyld þe werste.
	Hyt was vpon a someres day,
	Also ich ou telle may,
	Allof þe gode kyng,
	Rod vpon is pleyȝyng
35	Bi þe see side,
	Þer he was woned to ryde.
	Wiþ him ne ride bote tuo -
	Al to fewe hue were þo!
	He fond by þe stronde,
40	Aryued on is londe,
	Schipes fyftene
	wiþ saraȝyns kene
	He askede whet hue sohten
	Oþer on is londe brohten.
45	A payen hit yherde,
	& sone hym onsuerede:
	"Þy lond folk we wolleþ slon,
	Þat euer Crist leueþ on
	& þe we wolleþ ryht anon.
50	Shalt þou neuer henne gon."
	Þe kyng lyhte of his stede,
	For þo he heuede nede,
	Ant his gode feren tuo;
	Mid y wis huem wes ful wo.
55	Swerd hy gonne gripe
	& to gedere smyte.
	Hy smyten vnder shelde
	Þat hy somme yfelde.

	Þe kyng hadde to fewe
60	Aȝeyn so monie schrewe;
	So fele mihten ethe
	Bringe þre to dethe.
	Þe payns com to londe
	& nomen hit an honde
65	Þe folk hy gonne quelle,
	& saraȝyns to felle.
	Þer ne myhte libbe
	Þe fremede ne þe sibbe.
	Bote he is lawe forsoke,
70	& to huere toke.
	Of alle wymmanne
	Werst wes godhyld þanne.
	For Allof hy wepeþ sore
	& for horn ȝet more.
75	Godild hade so muche sore
	Þat habbe myhte hue na more
	Hue wente ut of halle
	From hire maidnes alle
	Vnder a roche of stone
80	Þer hue wonede al one.
	Þer hue seruede gode
	Aȝen þe payenes forbode.
	Þer hue seruede crist
	Þat þe payenes hit nuste.
85	Ant euer hue bad for horn child
	Þat crist him wrþe myld.

	Horn wes in payenes honde
	Mid is feren of þe londe.
	Muche wes þe feyrhade,
90	Þat ihesu crist him made.
	Payenes him wolde slo,
	& summe him wolde flo,
	ȝyf hornos feyrnesse nere:
	Yslawe þis children were.
95	Þo spec on Admyrold -
	Of wordes he wes swyþe bold, -
	"Horn, þou art swyþe kene,
	Bryht of hewe & of shene.
	Þou art fayr & eke strong,
100	& eke eueneliche long;
	Þu shalt waxe more
	Bi fulle seue ȝere.
	ȝef þu to lyue mote go
	Ant þine feren al so,
105	Þat ymay byfalle,
	Þat ȝe shulle slen vs alle:
	Þare fore þou shalt to streme go,
	Þou and þine feren al so;
	To shipe ȝ shulle founde,
110	& sinke to þe grounde.
	Þe see þe shal adrenche,
	Ne shal hit vs of þenche.
	For ȝef þou were alyue,
	Wiþ suerd oþer wiþ knyue,
115	We shulden alle deȝe,
	Þy fader deþ to beye."
	Þe children ede to þe stronde,
	Wryngynde huere honde,
	Ant in to shipes borde
120	At þe furste worde.
	Ofte hade horn be wo,
	Ah neuer wors þen him wes þo.

	Þe see bigan to flowen,
	& horn faste to rowen;
125	Ant þat ship wel suyþe drof
	& horn wes adred þer of.
	Hue wenden mid y wisse
	Of huere lyue to misse,
	Al þe day & al þe nyht
130	O þat sprong þe day lyht,
	Fflotterede horn by þe stronde
	Er he seye eny londe.
	"Feren," quoth horn þe ȝynge,
	"Ytelle ou tydynge:
135	Ich here foules singe
	& se þe grases springe.
	Blyþe be ȝe alyue;
	Vr ship is come to ryue."
	Of shipe hy gonne founde,
140	& sette fot to grounde.
	By þe see syde
	Hure ship bi gon to ryde.
	Þenne spec him child horn,
	In suddene he was yborn:
145	"Nou ship by þe flode,
	Haue dayes gode.
	Bi þe see brynke,
	No water þe adrynke.
	Softe mote þou sterye
150	þat water þe ne derye.
	ȝef þu comest to suddene,
	Gret hem þat me kenne,
	Gret wel þe gode
	Quene godhild mi moder,
155	Ant seye þe heþene kyng,
	Ihesu cristes wytherlyng,
	Þat ich am hol & fere
	In londe aryued here;
	Ant say þat he shal fonde
160	Þen deþ of myne honde."

	Þe ship bigon to fleoten,
	& horn child to weopen,
	By dales & by dounes.
	Þe children eoden to tounes,
165	Metten hue Eylmer þe kyng,
	Crist him ȝeuen god tymyng,
	Kyng of westnesse
	Crist hym myhte blesse!
	He spec to horn child
170	Wordes suyþe myld:
	"Whenne be ȝe, gomen,
	Þat bueþ her a londe ycomen,
	Alle threttene,
	Of bodye suyþe kene?
175	By god þat me made,
	So feyr a felaurade
	Ne seh yneuer stonde,
	In westnesse londe:
	Seie me wat ȝe seche."
180	Horn spac huere speche,

	Horn spac for huem alle,
	For so hit moste byfalle:
	He wes þe wyseste
	& of wytte þe beste.
185	"We bueþ of suddenne,
	Ycome of gode kenne,
	Of cristene blode,
	Of cunne swyþe gode.
	Payenes þer connen aryue
190	And cristine brohten of lyue.
	Slowen & to drowe
	Cristinemen ynowe.
	So crist me mote rede,
	Ous hy duden lede
195	In to a galeye,
	Wiþ þe se to pleye,
	Day is gon & othþer,
	Wiþ oute seyl & roþer:
	Vre ship flet forþ ylome
200	& her to londe hit ys ycome.
	Nou þou myht vs slen & bynde
	Oure honde vs bihynde.
	Ah ȝef hit is þi wille,
	Help vs þat we ne spille."

205	Þo spac þe gode kyng
	He nes neuer nyþyng
	"Sey, child, whet is þy name?
	shal þe tide bote game."
	Þe child him onsuerede,
210	So sone he hyt yherde:
	"Horn ycham yhote,
	Ycome out of þis bote,
	From þe see side.
	Kyng, wel mote þe bitide."
215	Horn child quoþ þe king,
	"Wel boruc þou þy nome ȝyng.
	Horn him goþ so stille
	Bi dales & bi hulles;
	Horn, haþ lude soune,
220	Þurh out vch a toune;
	So shal þi name springe
	Fram kynge to kynge,
	And þi nom springe
	From kynge to kynge,
225	Ant þi feirnesse
	Aboute westnesse,
	Horn, þou art so suete,
	Ne shal y þe forlete."
	Hom rod Aylmer þe kyng
230	& horn wiþ him, his fundlyng,
	& alle his yfere,
	Þat him were so duere.
	Þe kyng com in to halle
	Among his knyhtes alle;
235	forþþ he clepeþ Aþelbrus,
	His stiward & him seide þus.
	"Stiward, tac þou here
	My fundling forto lere
	Of þine mestere,
240	Of wode & of riuere,
	Ant toggen oþ harpe
	wiþ is nayles sharpe,
	Ant tech him alle þe listes
	Þat þou euer wystest,
245	Byfore me to keruen,
	& of my coupe to seruen.
	Ant his feren deuyse
	Wiþ ous oþer seruise.
	Horn child þu vnderstond
250	Tech him of harpe & of song."

	Athelbrus gon leren
	Horn & hyse feren.
	Horn mid herte lahte
	Al þat mon him tahte.
255	Wiþ inne court & wiþ oute,
	& oueral aboute
	Louede men horn child,
	& most him louede rymenyld,
	Þe kynges oune dohter.
260	For he wes in hire þohte;
	Hue louede him in hire mod
	For he wes feir & eke god:
	& þah hue ne dorste at bord
	Mid him speke ner a word,
265	Ne in þe halle
	Among þe knyhtes alle,
	Hyre sorewe ant hire pyne
	Nolde neuer fyne.
	Bi daye ne by nyhte
270	For hue speke ne myhte.
	Wiþ horn þat was so feir & fre
	Þo hue ne myhte wiþ him be.
	In herte hue hade care & wo,
	& þus hue biþohte hire þo:
275	Hue sende hyre sonde
	Athelbrus to honde,
	Þat he come hire to,
	& also scholde horn do,
	In to hire boure,
280	For hue bigon to loure;
	& þe sonde sayde
	Þat seek wes þe mayde,
	& bed him come suyþe
	For hue nis nout blyþe.

285	Þe stiward wes in huerte wo,
	For he nuste whet he shulde do.
	What rymenhild bysohte
	Gret wonder him þohte,
	Aboute horn þe ȝinge
290	To boure forte bringe.
	He þohte on is mode
	Hit nes for none gode:
	He toke wiþ him an oþer,
	Athulf, hornes broþer.
295	"Athulf," quoþ he, "ryht anon
	Þou shalt wiþ me to boure gon
	To speke wiþ rymenhild stille
	To wite hyre wille.
	Þou art hornes yliche
300	Þu shalt hire by suyke:
	Sore me adrede
	Þat hue wole horn mys rede."
	Athelbrus & Athulf bo,
	To hire boure beþ ygo:
305	Vpon Athulf childe
	Rymenild con waxe wilde:
	Hue wende horn it were
	Þat hue hade þere:
	Hue seten adoun stille;
310	Ant seyden hure wille;
	In hire armes tueye
	Athulf he con leye.
	"Horn," quoth heo, "wel longe
	Y haue loued þe stronge.
315	Þou shalt þy treuþe plyhte
	In myn hond wiþ ryhte,
	Me to spouse welde,
	& ich þe louerd to helde."
	So stille so hit were,
320	Athulf seyde in hire eere
	"Ne tel þou no more speche,
	May y þe by seche,
	Þi tale gyn þou lynne
	For horn nis nout her ynne.
325	Ne be we nout yliche:
	For horn is fayr & ryche,
	Fayrore by one ribbe
	Þen ani mon þat libbe:
	Þah horn were vnder molde
330	& oþer elle wher he sholde
	Hennes a þousent milen,
	Ynulle him bigilen."

	Rymenild hire bywente,
	Ant Athelbrus þus heo schende.
335	"Athelbrus þou fule þef,
	Ne worþest þou me neuer lef;
	Went out of my boure,
	Shame þe mote by shoure.
	Ant euele hap to Schame mote vnderfonge
340	& euele rode on to honge.
	Ne speke y nout wiþ horne:
	Nis he nout so vnorne;
	Horn is fairer thane beo he:
	wiþ muchel schame mote þu deie."

345	Þo Athelbrus astounde
	Fel akneu to grounde.
	"Ha leuedy min owe,
	Me lyþe a lytel throwe!
	Ant list were fore ych wonde
350	To bringen horn to honde.
	For orn is fayr & riche,
	Nis non his ylyche.
	Aylmer, þe gode kyng,
	Dude him me in lokyng.
355	ȝif horn þe were aboute,
	Sore ich myhte doute
	Wiþ him þou woldest pleye
	Bituene ou seluen tueye.
	Þenne shulde wiþ outen oþe
360	Þe kyng vs make wroþe.
	Ah forȝef me þi teone,
	My leuedy ant my quene,
	Horn y shal þe fecche,
	Wham so hit yrecche."
365	Rymenild, ȝef he couthe,
	Con lyþe wiþ hire mouthe.
	Heo loh & made hire blyþe;
	For wel wes hire olyue.
	"Go þou," quoþ heo, "sone,
370	& send him after none,
	A skuȝeres wyse.
	Whene þe king aryse
	He shal mid me bileue
	Þat hit beo ner eue,
375	Haue ich of him mi wille;
	Ne recchi whet men telle." :

	Athelbrus goþ wiþ alle;
	Horn he fond in halle
	Bifore þe kyng obenche,
380	Wyn forte schenche.
	"Horn," quoþ he, "þou hende,
	To boure gyn þou wende,
	To speke wiþ rymenild þe ȝinge,
	Dohter oure kynge;
385	Wordes suyþe bolde,
	þin horte gyn þou holde.
	Horn be þou me trewe;
	Shal þe nout arewe."
	He eode forþ to ryhte
390	To rymenild þe bryhte.
	Aknewes he him sette,
	& suetliche hire grette.
	Of his fayre syhte
	Al þat bour gan lyhte.
395	He spac faire is speche -
	Ne durþ non him teche.
	"Wel þou sitte & softe,
	Rymenild kinges dohter,
	Ant þy maydnes here
400	Þat sitteth þyne yfere.
	Kynges styward oure
	Sende me to boure
	Forte y here leuedy myn
	Whet be wille þyn.
405	Rymenild vp gon stonde
	& tok him by þe honde:
	Heo made feyre chere
	& tok him bi þe suere.
	Ofte heo him custe,
410	So wel so hyre luste.
	"Welcome horn," þus sayde,
	Rymenild þat mayde
	An euen & amorewe
	For þe ich habbe forewe
415	Þat y haue no reste
	Ne slepe me ne lyste.
	Horn þou shalt wel swyþe
	Mi longe serewe lyþe
	Þou shalt wyþ oute striue
420	Habbe me to wyue.
	Horn, haue of me rewþe,
	& plyht me þi treuþe.

	Horn þo him byþohte
	Whet he speken ohte.
425	"Crist," quoþ horn, "þe wisse,
	& þeue þe heuene blisse
	Of þine hosebonde,
	Who he be a londe.
	Ich am ybore þral
430	Þy fader fundlyng wiþ al.
	Of kunde me ne felde
	Þe to spouse welde.
	Hit nere no fair weddyng
	Bituene a þral & þe king."
435	Þo gon rymenild mis lyken
	& sore bigon to siken:
	Armes bigon vnbowe;
	& doun heo fel yswowe.
	Horn hire vp hente
440	& in is armes trente.
	He gon hire to cusse
	& feyre forte wisse.
	"Rymenild," quoþ he, "duere,
	Help me þat ych were
445	Ydobbed to be knyhte,
	Suete, bi al þi mihte,
	To mi louerd þe kyng
	Þat he me ȝeue dobbyng:
	Þenne is my þralhede
450	Al wend in to knyhthede.
	Y shal waxe more,
	& do, rymenild, þi lore."
	Þo rymenhild, þe yinge,
	Aros of hire swowenynge.
455	"Nou horn, to soþe,
	Yleue þe by þyn oþe.
	Þou shalt be maked knyht
	Er þen þis forteniht.
	Ber þou her þis coppe
460	& þis ringes þer vppe
	To Athelbrus þe styward,
	& say him he holde foreward.
	Sey ich him biseche,
	wiþ loueliche speche,
465	Þat he for þe falle
	To þe kynges fet in halle,
	Þ he wiþ is worde
	Þe knyhty wiþ sworde,
	wiþ selver and wiþ golde
470	Hit worth him wel iȝolde.
	Nou crist him lene spede
	Þyn ernding do bede."

	Horn tok is leue,
	For hit wes neh eue.
475	Athelbrus he sohte
	& tok him þat he brohte,
	Ant tolde him þare
	Hou he hede yfare.
	He seide him his nede,
480	& him bihet is mede.
	Athelbrus so blyþe
	Eode in to halle swyþe.
	Ant seide, "kyng, nou leste
	O tale mid þe beste.
485	Þou shalt bere coroune
	To marewe in þis toune;
	To marewe is þi feste:
	Þe bihoueþ geste.
	Ich þe rede mid al my myht
490	Þat þou make horn knyht,
	Þin armes do him welde:
	God knyht he shal þe ȝelde."
	Þe kyng wel sone,
	"Hit is wel to done.
495	Horn me wel quemeþ;
	Knyht him wel bisemeþ.
	He shal haue mi dobbyng
	& be myn oþer derlyng.
	& hise feren tuelfalle his feren twef
500	He shal dobbe him selue:
	Alle y shal hem knyhte
	Byfore me to fyhte."
	Al þat þe lyhte day sprong
	Aylmere þohte long.
505	Þe day bigon to springe;
	Horn com byfore þe kynge,
	Wiþ his tuelf fere,
	Alle þer ywere.
	Horn knyht made he
510	wiþ ful gre solempnite.
	Sette him on a stede:
	red so eny glede.
	Smot him a lute wiht
	& bed him buen a god knyht.
515	Athulf vel a kne þer
	& þonkede kyng Aylmer.
	"King," he sede, "so kene
	Grante me a bene:
	Nu is knyht sire horn
520	Þat in suddene wes yborn;
	Lord he is of londe
	& ouer vs þat by him stonde;
	Þin armes he haueþ and þy sheld
	Forte fyhte in þe feld:
525	Let him vs alle knyhte
	So hit is his ryhte."
	Aylmar seide ful ywis,
	"Nou do þat þi wille ys."
	Horn adoun con lyhte
530	& made hem alle to knyhte.
	For much wes þe geste
	& more wes þe feste:
	Þat rymenild nes nout þere,
	Hire þohte seue ȝere.
535	Efter horn hue sende,
	Horn in to boure wende.
	He nolde gon is one;
	Athulf wes hys ymone.

	Rymenild welcomeþ sire horn,
540	& Aþulf knyht him biforn.
	Knyht, nou is time
	For to sitte byme.
	Do nou þat we spake:
	To þi wyf þou me take.
545	Nou þou hast wille þyne,
	Vnbynd me of þis pyne."
	"Rymenild, nou be stille!
	Ichulle don al þy wille,
	Ah her hit so bitide.
550	Mid spere ichulle ryde,
	Ant my knyhthod proue,
	Er þen ich þe wowe.
	We bueþ knyhtes ȝonge,
	Alle to day yspronge;
555	Ant of þe mestere
	Hit is þe manere:
	wiþ sum oþere knyhte
	For his lemmon to fyhte
	Er ne he eny wyf take;
560	Oþer wyþ wymmon forewart make.
	To day, so crist me blesse,
	Y shal do pruesse,
	For þi loue mid shelde
	Amiddewart þe felde.
565	ȝef ich come to lyye,
	Ychul þe take to wyue."
	"Knyht, y may yleue þe,
	Why ant þou trewe be:

	Haue her þis goldring:
570	Hit is ful god to þi dobbyng;
	Ygraued is on þe rynge
	'Rymenild þy luef þe ȝynge':
	Nis non betere vnder sonne
	Þat enymon of conne.
575	Ffor mi loue þou hit were
	& on þy fynger þou hit bere.
	Þe ston haueþ suche grace
	Ne shalt þuo in none place
	Deþ vnderfonge,
580	Ne buen yalye wiþ wronge,
	ȝef þou lokest þeran
	& þenchest o þi lemman.
	Ant sire athulf, þi broþer,
	He shal han en oþer.
585	Horn, crist y þe byteche
	Mid mourninde speche,
	Crist þe ȝeue god endyng
	&e found aȝeyn to brynge."
	Þe knyht hire gan to cusse,
590	& rimenild him to blesse.
	Leue at hyre he nom,
	& in to halle he com:
	Knyhtes eode to table,
	& horn eode to stable:
595	Þer he toc his gode fole,
	Blac so euer eny cole.
	Wiþ armes he him fredde
	Ant is fole he fedde.
	Þe fole bigon to springe,
600	& horn murie to synge.
	Horn rod one whyle
	Wel more þen amyle.
	He seh a shyp at grounde
	wiþ heþene hounde.
605	He askede wet hue hadden
	oþer to londe ladden.
	An hound him gan biholde
	& spec wordes bolde:
	"þis lond we wolleþ wynne
610	& sle þat þer bueþ inne."
	Horn gan is swerd gripe
	Ant on his arm hit wype.
	Þe saraȝyn he hitte so
	Þat is hed fel to ys to;
615	Þo gonne þe houndes gone
	Aȝeynes Horn ys one;
	He lokede on is rynge,
	Ant þohte o rymenyld þe ȝynge.
	He sloh þer of þe beste
620	An houndred at þe leste,
	Ne mihte noman telle
	Alle þat he gon quelle.
	Of þat þer were oryue,
	He lafte lut o lyue.

625	Horn tok þe maister heued,
	Þat he him hade byreued
	Ant sette hit on is suerde,
	Abooen oþen orde.
	He ferde hom to halle,
630	Among þe knyhtes alle.
	"Kyng," quoþ he, "wel þou sitte,
	And alle þine knyhtes mitte.
	To day, ich rod o my pleyyng,
	After my dobbyng
635	Yfond a ship rowen
	In þe found byflowen
	Mid vnlondisshe menne
	Of saraȝynes kenne.
	To deþe forte pyne
640	Þe & alle þyne.
	Hy gonne me asayly:
	Swerd me nolde fayly:
	Y smot hem alle to grounde,
	In a lutel stounde.
645	Þat heued ich þe brynge
	Of þe maister kynge.
	Nou haue ich þe ȝolde,
	þat þou me knyhten woldest."
	Þe day bigon to springe,
650	Þe kyng rod on hontynge.
	To þe wode wyde,
	Ant ffykenyld bi is syde.
	Þat fals wes ant vntrewe,
	Whose him wel yknewe.

655	Horn ne þohte nout him on
	Ant to boure wes ygon.
	He fond rymenild sittynde
	& wel fore wepynde.
	So whyt so þe sonne
660	mid terres al byronne.
	Horn seide, "Luef, þyn ore!
	Whyi wepes þou so sore?"
	Hue seide, "ich nout ne wepe,
	Ah y shal er yslepe
665	Me þohte omy metyng,
	Þat ich rod ofysshyng,
	To see my net ycaste
	And wel fer hit laste;
	A gret fyssh ate þe ferste
670	My net he gan to berste.
	Þat fyssh me so bycahte
	Þat y nout ne lahte
	Ywene yshal forleose
	Þe fyssh þat ywolde cheose."

675	"Crist & seinte steuene,"
	Quoþ horn, "Areche þy sueuene.
	No shal y þe byswyke,
	Ne do þat þe mis lyke.
	Ich take þe myn owe
680	To hold & eke to knowe
	For euerech oþer wyhte,
	Þerto my trouþe yplyhte."
	Wel muche wes þe reuþe
	Þat wes at þilke treuþe,
685	Rymenild wep wel ylle,
	Ant horn let terres stille.
	"Lemmon," quoþ he, "dere,
	Þou shalt more y here.
	Þy sweuen shal wende
690	Summon vs wole shende.
	Þat fyssh þat brac þy net,
	Ywis it is sumwet
	Þat wol vs do sum tene,
	Ywis hit worþ ysene."
695	Aylmer rod by stoure,
	Ant horn wes yne boure.
	Ffykenyld hade enuye
	& seyde þeos folye:
	"Aylmar, ich þe werne
700	Horn þe wole forberne:
	Ich herde wher he seyde,
	Ant his suerd he leyde,
	To brynge þe of lyue,
	Ant take rymenild to wyue.
705	He lyht in boure
	Vnder couertoure
	By rymenyld þy dohter,
	Ant so he doþ wel ofte.
	Do him out of londe,
710	Er he do more shonde!"

	Aylmer gan hom turne
	Wel mody & wel sturne.
	He fond Horn vnder arme
	In rymenyldes barme.
715	"Go out," quoþ Aylmer þe kyng,
	Horn, þou foule fundlyng!
	Forþ out of boures flore
	For rymenild þin hore.
	Wend out of londe sone,
720	Her nast þou nout to done..
	Wel sone bote þou flette,
	Myd suert yshal þe sette."
	Horn eode to stable
	Wel modi for that fable.
725	He set sadel on stede
	Wiþ armes he gon him shrede.
	His brunie he con lace
	So he shulde in to place.
	His suerd he gon teon:
730	Ne durste non wel him feon.
	He seide, "Lemmon derlyng,
	Nou þou hauest þy sueuening.
	Þe fyssh þat þyn net rende,
	From þe me he sende.
735	Þe kyng wiþ me gynneþ striue,
	A wey he wole me dryue.
	Þare fore haue nou godneday:
	Nou y mot founde & fare away.
	In to vncouþe londe,
740	Wel more forte fonde;
	Yshal wonie þere
	Fulle seue ȝere.
	At þe seue ȝeres ende,
	ȝyf y ne come ne sende,
745	Tac þou hosebonde;
	Forme þat þou no wonde.
	In armes þou me fonge,
	Ant cus me swyþe longe."
	Hy custen hem astounde
750	& rymenyld fel to grounde.

	Horn tok his leue:
	He myhte nout bileue;
	He toc Aþulf, his fere,
	Aboute þe swere,
755	Ant seide, "knyht so trewe,
	Kep wel mi loue newe.
	Þou neuer ne forsoke:
	Rymenild to kep ant loke.
	His stede he bigan stryde,
760	Ant forþ he con him ryde:
	Aþulf wep wiþ eyȝen
	Ant alle þat hit yseyȝen.
	Horn forþ him ferde,
	A god ship he him herde,
765	Þat him shulde passe
	Out of westnesse.
	Þe wynd bigon to stonde,
	Ant drof hem vp olonde.
	To londe þat hy fletten
770	Fot out of ship hy setten.
	He fond bi þe weye
	Kynges sones tueye;
	Þat on wes hoten Aþyld,
	Ant þat oþer beryld.
775	Beryld hym con preye
	Þat he shulde seye
	What he wolde þere
	Ant what ys nome were.

	"Godmod," he seiþ, "ich hote,
780	Ycomen out of þis bote,
	Wel fer from by weste
	To seche myne beste."
	Beryld con ner him ryde
	And toc him bi þe bridel:
785	"Wel be þou, knyht, yfounde;
	wiþ me þou lef astounde.
	Al so ich mote sterue,
	Þe kyng þou shalt serue.
	Ne seh I neuer alyue
790	So feir knyht her aryue."
	Godmod he ladde to halle,
	Ant he adoun gan falle:
	Ant sette him a knelyng
	Ant grette wel þe gode kyng.
795	Þo saide beryld wel sone:
	"Kyng, wiþ him þuo ast done;
	Þilond tac him to werie;
	Ne shal þe nomon derye,
	For he is þe feyreste man
800	Þat euer in þis londe cam."

	Þo seide þe kyng wel dere,
	"Welcome be þou here.
	Go, beryld, wel swyþe,
	& make hym wel blyþe.
805	Ant when þou farest to wowen,
	Tac him þine glouen:
	Þer þou has munt to wyue,
	A wey he shal þe dryue;
	For Godmodes feyrhede
810	Shalt þeou no wer spede."
	Hit wes at cristesmasse,
	Nouþer more no lasse;
	Þe kyng made feste
	Of his knyhtes beste,
815	Þer com in at none
	A geaunt suyþe sone
	Y armed of paynyme
	Ant seide þthise ryme:
	"Site kyng, bi kyng,
820	Ant herkne my tidynge:
	Her bueþ paynes aryue;
	Wel more þen fyue
	Her beþ vpon honde,
	Kyng, in þine londe;
825	On þer of wol fyhte
	To ȝeynes þre knyhtes.
	ȝef oure þre sleh ure on,
	We shulen of ore londe gon;
	ȝef uore on sleh oure þre,
830	Al þis lond shal vre be.
	To morewe shal be þe fyhtinge,
	At þe sonne vpspringe."

	Þo seyde þe kyng þurston,
	"Godmod shal be þat on;
835	Beryld shal be þat oþer,
	Þe thridde Aþyd his broþer;
	For hue bueþ þe strongeste
	Ant in armes þe beste.
	Ah wat shal vs to rede?
840	I wene we bueþ dede."
	Godmod set at borde
	And seide þeose wordes:
	"Sire kyng, nis no ryhte
	On wiþ thre fyhte:
845	Aȝeynes one hounde,
	Þre cristene to founde.
	Ah, kyng, yshal alone,
	Wiþ oute more ymone,
	wiþ my suerd ful eþe
850	Bringen hem alle to deþe."
	Þe kyng aros amorewe,
	He hade muche sorewe;
	Godmod ros of bedde,
	wiþ armes he him shredde:
855	His brunye he on caste,
	& knutte hit wel faste,
	Ant com him to þe kynge
	At his vp rysynge.
	"Kyng," quoþ he, "com to felde,
860	Me forte byhelde
	Hou we shule flyten,
	Ant to gedere smiten."

	Riht at prime tide
	Hy gonnen out to ryde
865	Hy founden in a grene
	A geaunt swyþe kene,
	His feren him biside
	Þ day forto abyde.
	Godmod hem gon asaylen
870	Nolde he nout faylen:
	He ȝef duntes inowe;
	Þe payen fel yswowe.
	Ys feren gonnen hem wiþ drawe,
	For huere maister wes neh slawe;
875	He seide, "knyht, ȝou reste
	A while ȝef þou leste."
	Y ne heuede new of monnes hond
	So harde duntes in non lond,
	Bote of þe kyng Murry,
880	Þat wes swiþe sturdy.
	He wes of Hornes kenne,
	Y sloh him in suddene.

	Godmod him gon to agryse,
	Ant his blod aryse.
885	Byforen him he seh stonde
	Þat drof him out of lond
	Ant fader his aquelde.
	He smot him vnder shelde.
	He lokede on is rynge
890	Ant þohte o rymenild þe ȝynge.
	Mid god suerd at þe furste,
	He smoth hom þourh þe huerte.
	Þe payns bigonne to fleon
	Ant to huere shype teon;
895	To ship hue wolden erne
	Godmod hem con werne.
	Þe kynges sonews tweyne
	Þe paiens slowe beyne.
	Þo wes Godmod swyþe wo
900	Ant þe payens he smot so
	Þat in a lutel stounde
	Þe paiens hy felle to grounde.
	Godmod ant is men
	Slowe þe payenes eueruchen.
905	His fader deþ & ys lond
	Awrek godmod wiþ his hond.
	Þe kyng wiþ reuful chere
	Lette leggen is sones on bere
	Ant bringen hom to halle
910	Much sorewe hue maden alle.
	In a chirche of lym & ston
	Me buriede hem wiþ ryche won.

	Þe kyng lette forþ calle
	His knyhtes alle.
915	Ant seide, "godmod, ȝef þou nere,
	Alle ded we were.
	Þou art boþe go & feyr,
	Her ymake þe myn heyr,
	For my sones bueþ yslawe,
920	Ant ybroht of lyf dawe.
	Dohter ich habbe one,
	Nys non so feyr of blod ant bone.
	Ermenild, þat feyre may,
	Bryht so eny someres day.
925	Hire wolle ich ȝeue þe
	Ant her kyng shalt þou be."
	He seyde, "more ichul þe serue,
	Kyng, er þen þou sterue.
	When y þy dohter ȝerne,
930	Heo ne shal me noþyng werne."
	Godmod wonede þere
	Fulle six ȝere
	Ant þe seueþe ȝer bygon
	To rymynild sonde ne sende he non.
935	Rymenyld wes in westnesse
	wiþ muche sorewenesse.
	A kyng þer gan aryue
	Ant wolde hyre han to wyue;
	At one were þe kynges
940	Of þat weddynge.
	Þe dayes were so sherte,
	Ant rymenild ne derste
	Latten on none wyse.
	A writ hue dude deuyse;
945	Aþulf hit dude wryte,
	Þat horn ne louede nout lyte.
	Hue sende hire sonde
	Into eueruche londe
	To sechen horn knyhte
950	Wher so er me myhte.
	Horn þerof nout herde
	Til o day þat he ferde
	To wode forte shete.
	A page he gan mete.
955	Horn seide, "Leue fere,
	Whet dest þou here?"
	"Sire, in lutel spelle,
	Y may þe sone telle.
	Ich seche from westnesse
960	Horn knyht of estnesse
	Ffor rymenild þat feyre may,
	Soreweþ for him nyht & day.
	A kyng hire shal wedde
	A sonneday to bedde,
965	Kyng Mody of reynis,
	Þat is hornes enimis.
	Ich habbe walked wyde,
	By þe see side;
	Ne mihte ich him neyer cleche
970	Wiþ nones kunnes speche,
	Ne may ich of him here
	In londe fer no nere."
	Wey la wey þe while!
	Him may hente gyle."

975	Horn hit herde wiþ earen,
	Ant spec wiþ wete tearen:
	"So wel, grom, þe bitide!
	Horn stond by þi syde.
	Aȝeyn to rymenild turne
980	& seye þat hue ne murne,
	Yshal be þer bitime,
	A sonneday er prime."
	Þe page wes wel blyþe
	& shipede wel suyþe.
985	Þe see him gon adrynke
	Þat rymenil may ofþinke.
	Þe see him con ded þrowe
	Vnder hire chambre wowe.
	Rymenild lokede wide
990	By þe see syde,
	ȝef heo seȝe horn come
	Oþer tidynge of eny gome:
	Þo fond heo hire sonde,
	Adronque by þe stronde,
995	þat shulde horn brynge.
	Hire hondes gon hue wrynge.
	Horn com to þurston þe kynge
	Ant tolde him þes tidynge.
	Ant þo he was biknowe
1000	Þat rymenild wes ys owe;
	Ant of his gode kenne
	Þe kyng of sudenne,
	Ant hou he sloh afelde
	Him þat is fader aquelde,
1005	Ant seide, "Kyng so wyse,
	ȝeld me my seruise.
	Rymenild help me wynne,
	Swyþe þat þou ne blynne:
	Ant yshal do to house
1010	Þy dohter wel to spouse:
	For hue shal to spuse haue
	Aþulf, my gode felawe,
	He is knyht mid þe beste
	& on of þe treweste."
1015	Þe kyng seide so stille,
	"Horn, do al þi wille."
	He sende so by sonde
	ȝend al is londe
	After knyhtes fyhte,
1020	Þ were men so lyhte.
	To him come ynowe
	Þat to shipe drowe.

	Horn dude him in þe weye
	In a gret galeye.
1025	Þe wynd bo gon to blowe
	In a lutel throghe.
	Þe see bi gan wiþ ship to gon
	To westnesse hem brohte anon.
	Hue striken seyl of maste
1030	Ant ancre gonnen caste,
	Matynes were yronge
	& þe masse ysonge.
	Of rymenild þe ȝynge
	& of Mody þe kynge.
1035	Ant horn wes in watere,
	Ne mihte he come no latere.
	He let his ship stonde,
	Ant com him vp to londe.
	His folk he made abyde
1040	Vnder a wode syde.

	Horn eode forh al one
	So he sprong of þe stone.
	En palmere he y mette
	& wiþ wordes hyne grette:
1045	"Palmere, þou shalt me telle,"
	He syde, "of þine spelle.
	So brouke þou þi croune,
	Why comest þou from toune?"
	Ant he seide on is tale,
1050	"Y come from a brudale
	From brudale wylde
	Of maide remenylde:
	Ne myhte hue nout dreȝe
	Þat hue ne wep wiþ eȝe.
1055	Hue seide þat hue nolde
	Be spoused wiþ golde.
	Hue hade hosbonde
	Þah he were out of londe.
	Ich wes in þe halle,
1060	Wiþ inne castel walle,
	A wey ygon glide:
	Þat dole ynolde abyde.
	Þer worþ a dole reuly,
	Þ brude wepeþ bitterly."
1065	Quoþ Horn, "so crist me rede,
	We wolleþ chaunge wede.
	Tac þou robe myne
	Ant ȝe sclaueyn þyne,
	To day yshal þer drynke
1070	Þat summe hit shal of þynke."
	Sclaueyn he gon doun legge,
	& horn hit dude on rugge,
	Ant toc hornes cloþes:
	Þat nout him were loþe.

1075	Horn toc bordoun & scrippe
	Ant gan to wrynge is lippe.
	He made foule chere,
	& bicollede is swere.
	He com to þe ȝateward,
1080	Þat him onsuerede froward:
	Horn bed vn do wel softe
	Moni tyme ant ofte;
	Ne myhte he ywynne
	Forto come þer ynne.
1085	Horn þe wyket puste
	Þ hit open fluste.
	Þe porter shulde abugge.
	He þrew him a doun þe brugge
	Þat þre ribbes crakede.
1090	Horn to halle rakede
	Ant sette him doun wel lowe
	In þe beggeres rowe;
	He lokede aboute
	Myd is collede snoute;
1095	Þ seh he rymenild sitte
	Ase hue were of wytte,
	Wepinde sore;
	Ah he seh nower þore
	Aþulf is gode felawe,
1100	Þat trewe wes in vch plawe.

	Aþulf wes o tour ful heh,
	To loke fer & eke neh
	After hornes comynge,
	ȝef water him wolde brynge.
1105	Þe see he seh flowe
	Ah horn nower rowe.
	He seyde on is songe:
	"Horn, þuo art to longe.
	Rymenild þou me bitoke
1110	Þat ich shulde loke;
	Ich haue yloked euere;
	& þou ne comest neuere."
	Rymenild ros of benche,
	Þ beer al forte shenche,
1115	After mete in sale,
	Boþe wyn & ale.
	An horn hue ber an honde,
	For þat wes lawe of londe.
	hue dronc of þe beere
1120	To knyht & skyere.
	Horn set at grounde;
	Him þohte he wes ybounde.

	He seide, "Quen so hende,
	To me hyderward þou wende;
1125	Þou shenh vs wiþ þe vurste;
	Þe beggares bueþ afurste."
	Hyre horn hue leyde a doune,
	Ant fulde him of þe broune
	A bolle of a galoun;
1130	Hue wende he were a glotoun.
	Hue seide, "tac þe coppe,
	Ant drync þis ber al vppe.
	Ne seh ich neuer, y wene,
	Beggare so kene."
1135	Horn toc hit his yfere
	& seide, "Quen so dere,
	No beer nullich ibite
	Bote of coppe white.
	Þou wenest ich be a beggere,
1140	Ywis icham a fisshere,
	Wel fer come by weste
	To seche mine beste.
	Min net lyht her hende,
	Wiþ inne a wel feyr pende.
1145	Ich haue leye þere
	Nou is þis þe seueþeȝere.
	Icham icome to loke
	ȝef eny fyssh hit toke.
	ȝef eny fyssh is þer inne,
1150	Þer of þou shalt wynne,
	Ffor icham come to fyssh.
	Drynke nully of dyssh:
	Drink to horn of horne.
	Wel fer ich haue y orne."

1155	Rymenild him gan bihelde;
	Hire herte fel to celde.
	Ne kneu hue noht his fysshyng,
	Ne him selue nothyng.
	Ah wonder hyre gan þynke
1160	Why for horn he bed drynke.
	Hue fulde þe horn of wyne
	Ant dronke to þat pelryne.
	Hue seide, "drync þi felle,
	& seþe þen me telle
1165	ȝef þou horn euer seȝ
	Vnder wode leȝ."

	Horn dronc of horn asptunde
	And threu ys ring to grounde.
	Ant seide, "Quene, þou þench
1170	What y þreu in þe drench."
	Þe quene eode to boure
	Mid hire maidnes foure.
	Hue fond þat hue wolde,
	Þe ryng ygraued of golde
1175	Þat horn of hyre hedde;
	Fol sore hyre adredde
	Þat Horn ded were,
	For his ryng was þere.
	Þo sende hue a damoisele
1180	After þilke palmere;
	"Palmere," quoþ hue, "so trewe,
	Þe ryng þat þou yn þrewe,
	Þou sey wer þou hit nome,
	Ant hyder hou þou come."
1185	He seyde, "By seint gyle,
	Ich eode mony myle,
	Wel fer ȝent by weste
	To seche myne beste.
	Mi mete forte bydde
1190	For so me þo bitidde.
	Ich fond horn knyht stonde
	To shipeward in stronde.
	He seide he wolde gesse
	To aryue in westnesse.
1195	Þe schip nom in to flode
	wiþ me & horn þe gode;
	Horn by gan be sek & deȝe,
	& for his loue me preȝe:
	To gon wiþ þe rynge
1200	To rymenild þe ȝynge.
	Wel ofte he hyne keste,
	Crist ȝeue is soule reste!

	Rymenild seide at þe firste,
	"Herte, nou to berste,
1205	Horn worþ þe no more,
	Þat haueþ þe hath pined for."
	Hue fel adoun a bedde,
	& after knyues gredde,
	To slein mide hire kyng loþe
1210	& hire selue boþe
	Wiþ inne þilke nyhte,
	Come ȝef horn ne myhte.
	To herte knyf hue sette,
	Horn in is armes hire kepte.
1215	& wypede a wey þe foule blake,
	Þ wes opon his suere
	Ant seide, "Luef so dere,
	Ne const þou me yknowe?
	Ne am ich horn þyn owe?
1220	Ich am horn of westnesse;
	In armes þou me kesse."
	Yclupten & kyste
	So longe so hem lyste.
	"Rymenild," quoþ he, "ich wende
1225	Doun to þe wodesende:
	For þer bueþ myne knyhte
	Worþi men & lyhte;
	Armed vnder cloþe,
	Hue shule make wroþe
1230	Þe kyng & hise gestes
	Þat bueþ at þise festes.
	To day ychulle huem cacche
	Nou ichulle huem vacche."

	Horn sprong out of halle
1235	Ys brunie he let falle.
	Rymenild eode of boure
	Aþulf hue fond loure.
	"Aþulf, be wel blyþe
	& to horn go swyþe.
1240	He is vnder wode bowe
	Wiþ felawes ynowe."
	Aþulf gon forþ springe
	For þat ilke tydynge.
	efter horn he ernde,
1245	Him þohte is herte bernde.
	He oftok him ywisse;
	Ant custe him wiþ blisse.
	Horn tok is preye
	Ant dude him in þe weye.
1250	Hue comen in wel sone:
	Þe ȝates weren vndone.
	Y armed suiþe thicke
	From fote to þe nycke,
	Alle þat þer euere weren
1255	Wiþ oute is trewe feren
	Ant þe kyng aylmare,
	Ywis he hade muche care,
	Monie þat þer sete
	Hure lyf hy gonne lete.
1260	Horn vnderstondyng ne hede
	Of ffykeles falsesede.
	Hue suoren alle ant seyde,
	Þat hure non him wreyede
	Ant suore oþes holde,
1265	Þat huere non ne sholde
	Horn neuer bytreye.
	Þah he on deþe leye.
	Þer hy ronge þe belle
	Þat wedlak to fulfulle.
1270	Hue wenden hom wiþ eyse
	To þe kynges paleyse,
	Þer wes brudale suete,
	For richemen þer ete.
	Telle ne mihte no tonge
1275	Þe gle þat þer was songe.

	Horn set in chayere,
	& bed hem alle yhere.
	He seyde, "kyng of londe,
	Mi tale þou vnderstonde.
1280	Ich wes ybore in sudenne:
	Kyng wes mi fader of kenne.
	Þou me to knyhte houe,
	Of knyhthod habbe y proue.
	Þou dryue me out of þi lond
1285	& seydest ich wes traytour strong;
	Þou wendest þat ich wrohte
	Þat I neuer ne þohte,
	By rymenild forte lygge,
	Ywys ich hit wiþ sugge.
1290	Ne shal ich hit agynne,
	Er ich sudenne wynne.
	Þou kep hyre me astounde,
	Þe while þat ich founde
	In to myn heritage,
1295	Wiþ þis yrisshe page.
	Þat lond ichulle þorhreche
	& do mi fader wreche.
	Ychul be kyng of toune,
	& lerne kynges roune;
1300	Þenne shal rymenild þe ȝynge
	Ligge by horn þe kynge."

	Horn gan to shipe drawe
	wiþ hys yrisse felawe,
	Aþulf wiþ him, his broþer:
1305	He nolde habbe non oþer.
	Þat shup by gan to croude;
	Þe wynd him bleu wel loude;
	Wyþ inne dawes fyue
	Þe ship bigan aryue
1310	Vnder sudennes side.
	Huere ship by gon to ryde
	Aboute þe midnyhte.
	Horn eode wel rihte;
	He nom Aþulf by honde
1315	& ede vp to londe.
	Hue fonden vnder shelde
	A knyht liggynde on felde.
	Oþe shelde was ydrawe
	A croyȝ of ihesu cristes lawe.
1320	Þe knyht him lay on slape
	In armes wel yshape.

	Horn him gan ytake
	& seide, "knyht, awake!
	Þou sei me whet þou kepest?
1325	& here whi þou slepest?
	Me þuncheþ by crois liste,
	Þat þou leuest on criste.
	Bote þuo hit wolle shewe,
	My suerd shal þe to hewe."
1330	Þe gode knyht up aros;
	Of hornes wordes him agros.
	He seide, "ich seruy ille
	Paynes to ȝeynes mi wille.
	Ich was cristene sumwhile:
1335	Ycome in to þis yle
	Saraȝyns loþe & blake,
	Me made ihesu forsake.
	To loke þis passage
	For horn þat is of age,
1340	Þat woneþ her by weste,
	God knyht mid þe beste;
	Hue slowe mid huere honde
	Þe kyng of þisse londe,
	Ant wiþ him mony honder,
1345	Þer fore me þuncheþ wonder
	Þat he ne comeþ to fyhte.
	God ȝeue him þe myhte,
	Þat wynd him hider dryue
	To don hem alle of lyue.
1350	Ant slowen kyng mury,
	Hornes cunesmon hardy.
	Horn of londe hue senten;
	Tuelf children wiþ him wenten,
	Wiþ hem wes aþulf þe gode,
1355	Mi child, myn oune fode:
	ȝef horn is hol ant sounde,
	Aþulf tit no wounde,
	He louede horn wiþ mihte,
	& he him wiþ ryhte.
1360	ȝef y myhte se hem tueye,
	Þenne ne rohti forte deye."

	"Knyht, be þenne blyþe
	Mest of alle syþe;
	Aþulf & horn is fere
1365	Boþe we beþ here."
	Þ knyht to horn gan skippe
	& in his armes clippe.
	Muche ioye hue maden yfere
	Þo hu to gedere y come were.
1370	He saide with steuene þare:
	"ȝungemen, hou habbe ȝe ȝore yfare?
	Wolle ȝe þis lond wynne
	& wonie þer ynne?"
	He seide, "Suete horn child,
1375	ȝet lyueþ þy moder godhyld:
	Of ioie hue ne miste
	O lyue ȝef hue þe wiste."
	Horn seide on is ryme,
	"Yblessed be þe time
1380	Icham icome to sudenne
	Wiþ mine yrisshemenne:
	We shule þe houndes kecche
	& to þe deȝe vecche.
	Ant so we shulen hem teche,
1385	To speken oure speche."

	Horn gon is horn blowe;
	Is folk hit con yknowe;
	Hue comen out of hurne,
	To horn swyþe ȝurne;
1390	Hue smiten & hue fyhten,
	Þe niht & eke þe ohtoun.
	Þe saraȝyns hue slowe
	Ant summe quike to drowe.
	Mid speres ord hue stonge
1395	Þe olde & eke þe ȝonge.

	Horn lette sone wurche
	Boþe chapel & chyrche;
	He made belles rynge
	Ant prestes masse synge.
1400	He sohte is moder halle
	In þe roche walle.
	He custe hire ant grette,
	Ant in to þe caste sette,
	Croune he gan werie,
1405	Ant make feste merye;
	Murie lif he þer wrohte.
	Ah rymenild hit abohte

	Þe whiles horn wes oute.
	Ffikenild ferde aboute,
1410	Þe betere forte spede,
	Þe riche he ȝef mede,
	Boþe ȝonge ant olde,
	Wiþ him forte holde;
	Ston he dude lade
1415	Ant lym þerto he made.
	Castel he made sette
	Wiþ water by flette.
	Þat þer yn come ne myhte
	Bote foul wiþ flyhte.
1420	Bote when þe see wiþ drowe,
	Þer myhte come ynowe.
	Þ fykenild gon by wende
	Rymenild forte shende.
	To wyue he gan hire ȝerne;
1425	Þe kyng ne durst him werne.
	Ant habbeþ set þe day
	Ffykenild to wedde þe may.
	Wo was rymenild of mode;
	Terres hue wepte of blode.
1430	Þilke nyht horn suete
	Con wel harde mete
	Of rymenild, his make,
	Þ into shipe wes take.
	Þe ship gon ouerblenche:
1435	Is lemmon shulde adrenche.

	Rymenild mid hure honde
	Swymme wolde to londe;
	Ffykenild aȝeyn hire pylte
	Mid his suerdes hylte.
1440	Horn awek in is bed
	Of his lemmon he wes adred.
	"Aþulf," he seide, "felawe,
	To shipe nou we drawe.
	Ffykenild me haþ gon vnder
1445	Ant do rymenild sum wonder.
	Crist, for his wondes fiue,
	To nyht þider vs driue."

	Horn gon to shipe ride,
	His knyhtes bi his side.
1450	Þe ship bigon to sture
	Wiþ wynd god of cure.
	Ant fikenild, her þe day springe,
	Ferde to þe kynge,
	After rymenild þe brhyhte,
1455	Ant spousede hyre by nyhte.
	He ladde hire bi derke
	In to his newe werke.
	Þe feste hue bigonne,
	Er þen aryse þe sonne.
1460	Er thane Horn hit wiste,
	Tofore þe sunne upriste,
	Hornes ship atstod in stoure
	Vnder fykenildes boure.
	Nuste Horn alyue
1465	Wher he wes aryue.
	Þene castel hue ne knewe,
	For he was so newe.
	Þe see bigon to wiþ drawe.
	Þo seh horn his felawe.
1470	Þe feyre knyht Arnoldyn,
	Þat wes Aþulfes cosyn,
	Þat þer set in þat tyde,
	Kyng horn to abide.
	He seide, "kyng horn, kyngessone,
1475	Hider þou art welcome.
	To day haþ sire ffykenild
	Ywedded þi wif rymenild.
	White þe nou þis while:
	He haueþ do þe gyle.
1480	Þis tour he dude make
	Al for rymenildes sake.
	Ne may þer comen ynne
	No mon wiþ no gynne.

	Horn, nou Crist þe wisse,
1485	Rymenild þat þou ne misse."
	Horn couþe alle þe listes
	Þat eni mon of wiste.
	Harpe he gon shewe,
	And toc to felawe,
1490	Knyhtes of þe beste
	Þat he euer hede of weste.
	Ouen o þe sherte
	Hue gurden huem wiþ suerde.
	Hue eoden on þe grauele
1495	Towart þe castele.
	Hue gonne murie singe
	& makeden huere gleynge.
	Þat Fykenild mihte y here.
	He axede who hit were.
1500	Men seide hi were harperis
	Iogelers ant fyþelers.
	Hem me dude in lete
	At halle dore hue sete.
	Horn sette him abenche,
1505	Is harpe he gan clenche.
	He made rymehild a lay,
	Ant hue seide walaway.

	Rymenhild fel yswowe
	Þo nes þer non þat louwe.
1510	Hit smot horn to herte
	Sore con him smerte.
	He lokede on is rynge
	Ant o rymenild þe ȝynge:
	He eode vp to borde
1515	Mid his gode suorde:
	Ffykenildes croune
	He fel þer adoune,
	Ant alle is men arowe,
	He dude adoun throwe.
1520	Ant made Arnoldyn þere
	After kyng Aylmere
	To be kyng of Westnesse
	For his mildenenesse.
	Þe kyng ant is baronage
1525	ȝeuen him truage.

	Horn toc rymenild by honde
	Ant ladde hire to stronde,
	And toc wiþ him Aþelbrus,
	Þe gode stiward of hire fader hous.
1530	Þe see bigan to flowen,
	Ant hy faste to rowen.
	Hu aryueden vnder reme
	In a wel feyr streme.
	Kyng Mody wes kyng in þat lond,
1535	Þat horn sloh wiþ is hond.
	Aþelbrus he made þer kyng
	For his gode techyng:
	For sire hornes lore
	He wes mad kyng þore.

1540	Horn eode to ryue;
	Þe wynd him con wel dryue.
	He aryuede in yrlonde,
	Þer horn wo couþe er fonde,
	He made þer Aþulf chyld
1545	Wedde mayden Ermenyld.
	Ant horn com to sudenne
	To is oune kenne;
	Rymenild he made þer is quene;
	So hit myhte ben.
1550	In trewe loue hue lyueden ay
	Ant wel hue loueden godes lay.
	Nu hue beoþ boþe dede -
	Crist to heouene vs lede! AmeN.

	Harley MS

	Her bygynneþ þe geste of Kyng Horn

	Alle heo ben blyþe
	þat to my song ylyþe
	a song ychulle ou singe
	of Allof þe gode kynge
5	kyng he wes by weste
	þe whiles hit yleste
	ant godylt his gode quene
	no feyrore myhte bene
	ant huere sone hihte horn
10	feyrore child ne myhte be born
	for reyn ne myhte by ryne
	ne sonne myhte shyne
	feyrore child þen he was
	bryht so euer eny glas
15	so whit so eny lylye flour
	so rose red wes his colour
	He wes feyr & eke bold
	ant of fyftene wynter old
	Nis non his yliche
20	in none kinges ryche
	tueye feren he hadde
	þat he wiþ him ladde
	alle richemenne sones
	& alle suyþe feyre gomes
25	wyþ him forte pleye
	mest he louede tueye
	þat on wes hoten Athulf chyld
	& þat oþer ffykenyld
	Athulf wes þe beste
30	ant fykenyld þe werste
	Hyt was vpon a someres day
	also ich ou telle may
	Allof þe gode kyng
	rod vpon ys pleyȝyng
35	bi þe see side
	þer he was woned to ryde
	wiþ him ne ryde bote tuo
	al to fewe hue were þo
	he fond by þe stronde
40	aryued on is londe
	shipes fyftene
	of saraȝynes kene
	he askede whet hue sohten
	oþer on is lond brohten
45	a payen hit yherde
	& sone him onsuerede
	þy lond folk we wolleþ slon
	þat euer crist leueþ on
	& þe we wolleþ ryht anon
50	shalt þou neuer henne gon
	þe kyng lyhte of his stede
	for þo he heuede nede
	ant his gode feren tuo
	mid y wis huem wes ful wo
55	swerd hy gonne gripe
	& to gedere smyte
	hy smyten vnder shelde
	þat hy somme yfelde
	þe kyng hade to fewe
60	aȝeyn so monie schrewe
	so fele myhten eþe
	bringe þre to deþe
	þe payns come to londe
	& nomen hit an honde
65	þe folk hy gonne quelle
	& saraȝyns to felle
	þer ne myhte libbe
	þe fremede ne þe sibbe
	bote he is lawe forsoke
70	& to huere toke
	of alle wymmanne
	werst wes godyld þanne
	for Allof hy wepeþ sore
	& for horn ȝet more
75	Godild hade so muche sore
	þat habbe myhte hue na more
	hue wente out of halle
	from hire maidnes alle
	vnder a roche of stone
80	þer hue wonede al one
	þer hue seruede gode
	aȝeyn þe payenes forbode
	þer hue seruede crist
	þat þe payenes hit nust
85	ant euer hue bad for horn child
	þat crist him wrþe myld
	Horn wes in payenes hond
	mid is feren of þe lond
	muche wes þe feyrhade
90	þat ihesu crist him made
	payenes him wolde slo
	& summe him wolde flo
	ȝyf hornos feyrnesse nere
	yslawe þis children were
95	þo spec on Admyrold
	of wordes he wes swyþe bold
	horn þou art swyþe kene
	bryht of hewe & shene
	þou art fayr & eke strong
100	& eke eueneliche long
	ȝef þou to lyue mote go
	ant þyne feren al so
	þat ymay byfalle
	þat ȝe shule slen vs alle
105	þare fore þou shalt to streme go
	þou ant þy feren al so
	to shipe ȝe shule founde
	& sinke to þe grounde
	þe see þe shal adrenche
110	ne shal hit vs of þenche
	for ȝef þou were alyue
	wiþ suerd oþer wiþ knyue
	we shulden alle deȝe
	þy fader deþ to beye
115	þe children ede to þe stronde
	wryngynde huere honde
	ant in to shipes borde
	at þe furste worde
	ofte hade horn be wo
120	ah neuer wors þen him wes þo
	þe see bygon to flowen
	& horn faste to rowen
	ant þat ship wel suyþe drof
	& horn wes adred þer of
125	hue wenden mid y wisse
	of huere lyue to misse
	al þe day & al þe nyht
	o þat sprong þe day lyht
	fflotterede horn by þe stronde
130	er he seye eny londe
	feren quoþ horn þe ȝynge
	ytelle ou tydynge
	Ich here foules singe
	& se þe grases springe
135	blyþe be ȝe alyue
	vr ship is come to ryue
	of shipe hy gonne founde
	& sette fot to grounde
	by þe see syde
140	hure ship bi gon to ryde
	þenne spec him child horn
	in sudenne he was yborn
	nou ship by þe flode
	haue dayes gode
145	by þe see brynke
	no water þe adrynke
	softe mote þou sterye
	þat water þe ne derye
	ȝef þou comest to sudenne
150	gret hem þat me kenne
	gret wel þe gode
	quene godild mi moder
	ant sey þene heþene kyng
	ihesu cristes wytherlyng
155	þat ich hol & fere
	in londe aryuede here
	ant say þat he shal fonde
	þen deþ of myne honde
	þe ship bigon to fleoten
160	& horn child to weopen
	by dales & by dounes
	þe children eoden to tounes
	metten hue Eylmer þe kyng
	crist him ȝeue god tymyng
165	kyng of westnesse
	crist him myhte blesse
	he spec to horn child
	wordes suyþe myld
	whenne be ȝe gomen
170	þat bueþ her a londe ycomen
	alle þrettene
	of bodye suyþe kene
	by god þat me made
	so feyr a felaurade
175	ne seh yneuer stonde
	in westnesse londe
	say me whet ȝe seche
	horn spec huere speche
	Horn spac for huem alle
180	for so hit moste byfalle
	he wes þe wyseste
	& of wytte þe beste
	we bueþ of sudenne
	ycome of gode kenne
185	of cristene blode
	of cunne swyþe gode
	payenes þer connen aryue
	and cristine brohten of lyue
	slowen & to drowe
190	cristinemen ynowe
	so crist me mote rede
	ous hy duden lede
	In to a galeye
	wiþ þe see to pleye
195	day is gon & oþer
	wiþ oute seyl & roþer
	vre ship flet forþ ylome
	& her to londe hit ys ycome
	Nou þou myht vs slen & bynde
200	oure honde vs bihynde
	ah ȝef hit is þi wille
	help vs þat we ne spille
	þo spac þe gode kyng
	he nes neuer nyþyng
205	sey child whet is þy name
	shal þe tide bote game
	þe child him onsuerede
	so sone he hit yherde
	Horn ycham yhote
210	ycome out of þis bote
	from þe see side
	kyng wel þe bitide
	horn child quoþ þe kyng
	wel brouc þou þy nome ȝyng
215	horn him goþ so stille
	bi dales & by hulles
	horn haþ loude soune
	þurh out vch a toune
	so shal þi nome springe
220	from kynge to kynge
	ant þi feirnesse
	aboute westnesse
	horn þou art so suete
	ne shal y þe forlete
225	Hom rod Aylmer þe kyng
	& horn wiþ him his fundlyng
	& alle his yfere
	þat him were so duere
	þe kyng com in to halle
230	among his knyhtes alle
	forþ he clepeþ Aþelbrus
	his stiward & him seide þus
	stiward tac þou here
	my fundling forto lere
235	of þine mestere
	of wode & of ryuere
	ant toggen oþe harpe
	wiþ is nayles sharpe
	ant tech him alle þe listes
240	þat þou euer wystest
	byfore me to keruen
	& of my coupe to seruen
	ant his feren deuyse
	wiþ ous oþer seruise
245	horn child þou vnderstond
	tech him of harpe & of song
	Athelbrus gon leren
	horn & hyse feren
	horn mid herte lahte
250	al þat mon him tahte
	wiþ inne court & wiþ oute
	& oueral aboute
	louede men horn child
	& most him louede rymenyld
255	þe kynges oune dohter
	for he wes in hire þohte
	hue louede him in hire mod
	for he wes feir & eke god
	& þah hue ne dorste at bord
260	mid him speke ner a word
	ne in þe halle
	among þe knyhtes alle
	hyre sorewe ant hire pyne
	nolde neuer fyne
265	bi daye ne by nyhte
	for hue speke ne myhte
	wiþ horn þat wes so feir & fre
	þo hue ne myhte wiþ him be
	In herte hue hade care & wo
270	& þus hue biþohte hire þo
	Hue sende hyre sonde
	Athelbrus to honde
	þat he come hire to
	& also shulde horn do
275	in to hire boure
	for hue bigon to loure
	& þe sonde sayde
	þat seek wes þe mayde
	& bed him come suyþe
280	for hue nis nout blyþe
	þe stiward wes in huerte wo
	for he nuste whet he shulde do
	what rymenild bysohte
	gret wonder him þohte
285	aboute horn þe ȝinge
	to boure forte bringe
	he þohte on is mode
	hit nes for none gode
	he toke wiþ him an oþer
290	aþulf hornes broþer
	Athulf quoþ he ryht anon
	þou shalt wiþ me to boure gon
	to speke wiþ rymenild stille
	to wyte hyre wille
295	þou art hornes yliche
	þou shalt hire by suyke
	sore me adrede
	þat hue wole horn mys rede
	Athelbrus & Athulf bo
300	to hire boure beþ ygo
	vpon Athulf childe
	rymenild con waxe wilde
	hue wende horn it were
	þat hue hade þere
305	Hue seten adoun stille
	ant seyden hure wille
	In hire armes tueye
	Athulf he con leye
	horn quoþ heo wel longe
310	y haue loued þe stronge
	þou shalt þy treuþe plyhte
	in myn hond wiþ ryhte
	me to spouse welde
	& ich þe louerd to helde
315	so stille so hit were
	athulf seyde in hire re
	ne tel þou no more speche
	may y þe by seche
	þi tale gyn þou lynne
320	for horn nis nout her ynne
	ne be we nout yliche
	for horn is fayr & ryche
	fayrore by one ribbe
	þen ani mon þat libbe
325	þah horn were vnder molde
	& oþer elle wher he sholde
	hennes a þousent milen
	ynulle him bigilen
	rymenild hire bywente
330	ant athelbrus þus heo shende
	Athelbrus þou foule þef
	ne worþest þou me neuer lef
	went out of my boure
	shame þe mote by shoure
335	ant euel hap to vnderfonge
	& euele rode on to honge
	Ne speke y nout wiþ horne
	nis he nout so vnorne
	þo Athelbrus astounde
340	fel akneu to grounde
	ha leuedy myn owe
	me lyþe a lutel þrowe
	ant list were fore ych wonde
	to bringen horn to honde
345	for horn is fayr & riche
	nis non his ylyche
	Aylmer þe gode kyng
	dude him me in lokyng
	ȝif horn þe were aboute
350	fore ich myhte doute
	Wiþ him þou woldest pleye
	bituene ou seluen tueye
	þenne shulde wiþ outen oþe
	þe kyng vs make wroþe
355	Ah forȝef me þi teone
	my leuedy ant my quene
	Horn y shal þe fecche
	wham so hit yrecche
	rymenild ȝef heo couþe
360	con lyþe wiþ hyre mouþe
	heo loh & made hire blyþe
	for wel wes hire olyue
	go þou quoþ heo sone
	& send him after none
365	a skuyeres wyfe
	when þe king aryse
	he shal myd me bileue
	þat hit be ner eue
	haue ich of him mi wille
370	ne recchi whet men telle
	Athelbrus goþ wiþ alle
	horn he fond in halle
	bifore þe kyng obenche
	wyn forte shenche
375	Horn quoþ he þou hende
	to boure gyn þou wende
	to speke wiþ rymenild þe ȝynge
	dohter oure kynge
	wordes suyþe bolde
380	þin horte gyn þou holde
	Horn be þou me trewe
	shal þe nout arewe
	he eode forþ to ryhte
	to rymenild þe bryhte
385	aknewes he him sette
	& suetliche hire grette
	of is fayre syhte
	al þat bour gan lyhte
	he spac faire is speche
390	ne durþ non him teche
	wel þou sitte & soste
	rymenild kinges dohter
	ant þy maydnes here
	þat sitteþ þyne yfere
395	Kynges styward oure
	sende me to boure
	forte y here leuedy myn
	whet be wille þyn
	rymenild vp gon stonde
400	& tok him by þe honde
	heo made feyre chere
	& tok him bi þe suere
	ofte heo him custe
	so wel hyre luste
405	Welcome horn þus sayde
	rymenild þat mayde
	an euen & amorewe
	for þe ich habbe sorewe
	þat y haue no reste
410	ne slepe me ne lyste
	horn þou shalt wel swyþe
	mi longe serewe lyþe
	þou shalt wyþ oute striue
	habbe me to wyue
415	horn haue of me reuþe
	& plyht me þi treuþe
	horn þo him byþohte
	whet he speken ohte
	crist quoþ horn þe wisse
420	& ȝeue þe heuene blisse
	of þine hosebonde
	who he be a londe
	ich am ybore þral
	þy fader fundlyng wiþ al
425	of kunde me ne felde
	þe to spouse welde
	hit nere no fair weddyng
	bituene a þral & þe kyng
	þo gon rymenild mis lyken
430	& sore bigon to syken
	armes bigon vnbowe
	& doun heo fel yswowe
	Horn hire vp hente
	& in is armes trente
435	he gon hire to cusse
	& feyre forte wisse
	rymenild quoþ he duere
	help me þat ych were
	ydobbed to be knyhte
440	suete bi al þi myhte
	to mi louerd þe kyng
	þat he me ȝeue dobbyng
	þenne is my þralhede
	Al wend in to knyhthede
445	y shal waxe more
	& do rymenild þi lore
	Þo rymenild þe ȝynge
	aros of hire swowenynge
	Nou horn to soþe
450	yleue þe by þyn oþe
	þou shalt be maked knyht
	er þen þis fourteniht
	ber þou her þes coppe
	& þes ringes þer vppe
455	to Athelbrus þe styward
	& say him he holde foreward
	sey ich him biseche
	wiþ loueliche speche
	þat he for þe falle
460	to þe kynges fet in halle
	þat he wiþ is worde
	þe knyhty wiþ sworde
	wiþ seluer & wiþ golde
	hit worþ him wel yȝolde
465	nou crist him lene spede
	þin erndyng do bede
	Horn toke is leue
	for hit wes neh eue
	Athelbrus he sohte
470	& tok him þat he brohte
	ant tolde him þare
	hou he hede yfare
	he seide him is nede
	& him bihet is mede
475	Athelbrus so blyþe
	eode in to halle swyþe
	ant seide kyng nou leste
	o tale mid þe beste
	þou shalt bere coroune
480	to marewe in þis toune
	to marewe is þi feste
	þe bihoueþ geste
	Ich þe rede mid al my myht
	þat þou make horn knyht
485	þin armes do him welde
	god knyht he shal þe ȝelde
	þe kyng seide wel sone
	hit is wel to done
	Horn me wel quemeþ
490	knyht him wel bysemeþ
	He shal haue mi dobbyng
	& be myn oþer derlyng
	& hise feren tuelue
	he shal dobbe him selue
495	alle y shal hem knyhte
	byfore me to fyhte
	al þat þe lyhte day sprong
	aylmere þohte long
	þe day bigon to springe
500	horn com byfore þe kynge
	wiþ his tuelf fere
	alle þer ywere
	horn knyht made he
	wiþ ful gret solempnite
505	sette him on a stede
	red so eny glede
	smot him a lute wiht
	& bed him buen a god knyht
	Athulf vel a kne þer
510	& þonkede kyng Aylmer
	Nou is knyht sire horn
	þat in sudenne wes yborn
	Lord he is of londe
	& of vs þat by him stonde
515	þin armes he haueþ & þy sheld
	forte fyhte in þe feld
	Let him vs alle knyhte
	so hit is his ryhte
	Aylmer seide ful ywis
520	nou do þat þi wille ys
	Horn adoun con lyhte
	& made hem alle to knyhte
	for muchel wes þe geste
	& more wes þe feste
525	þat rymenild nes nout þere
	hire þohte seue ȝere
	efter horn hue sende
	horn in to boure wende
	He nolde gon is one
530	Athulf wes hys ymone
	rymenild welcomeþ sire horn
	& aþulf knyht him biforn
	knyht nou is tyme
	forto sitte byme
535	do nou þat we spake
	to þi wyf þou me take
	Nou þou hast wille þyne
	vnbynd me of þis pyne
	rymenild nou be stille
540	ichulle don al þy wille
	ah her hit so bitide
	mid spere ichulle ryde
	ant my knyhthod proue
	er þen ich þe wowe
545	we bueþ nou knyhtes ȝonge
	alle to day yspronge
	ant of þe mestere
	hit is þe manere
	wiþ sum oþer knyhte
550	for his lemmon to fyþte
	er ne he eny wyf take
	oþer wyþ wymmon forewart make
	to day so crist me blesse
	y shal do pruesse
555	for þi loue mid shelde
	amiddewart þe felde
	ȝef ich come to lyue
	ychul þe take to wyue
	knyht y may yleue þe
560	why ant þou trewe be
	haue her þis goldring
	hit is ful god to þi dobbyng
	ygraued is on þe rynge
	rymenild þy luef þe ȝynge
565	nis non betere vnder sonne
	þat enymon of conne
	ffor mi loue þou hit were
	& on þy fynger þou hit bere
	þe ston haueþ suche grace
570	ne shalt þou in none place
	deþ vnderfonge
	ne buen yslaye wiþ wronge
	ȝef þou lokest þeran
	& þenchest o þi lemman
575	ant sire athulf þi broþer
	he shal han en oþer
	Horn crist y þe byteche
	myd mourninde speche
	crist þe ȝeue god endyng
580	& sound aȝeyn þe brynge
	þe knyht hire gan to cusse
	& rymenild him to blesse
	leue at hyre he nom
	& in to halle he com
585	knyhtes eode to table
	& horn eode to stable
	þer he toc his gode fole
	blac so euer eny cole
	wiþ armes he him sredde
590	ant is fole he fedde
	þe fole bigon to springe
	& horn murie to synge
	Horn rod one whyle
	wel more þen amyle
595	he seh a shyp at grounde
	wiþ heþene hounde
	He askede wet hue hadden
	oþer to londe ladden
	an hound him gan biholde
600	& spek wordes bolde
	þis land we wolleþ wynne
	& sle þat þer bueþ inne
	Horn gan is swerd gripe
	ant on is arm hit wype
605	þe saraȝyn he hitte so
	þat is hed fel to ys to
	þo gonne þe houndes gone
	aȝeynes Horn ys one
	He lokede on is rynge
610	ant þohte o rymenyld þe ȝynge
	he sloh þer of þe beste
	an houndred at þe leste
	ne mihte no mon telle
	alle þat he gon quelle
615	of þat þer were oryue
	he lafte lut o lyue
	Horn tok þe maister heued
	þat he him hade byreued
	ant sette on is suerde
620	abouen oþen orde
	he ferde hom to halle
	among þe knyhtes alle
	kyng quoþ he wel þou sitte
	& þine knyhtes mitte
625	to day ich rod omy pleyyng.
	after my dobbyng
	yfond a ship rowen
	in þe sound byflowen
	Mid vnlondisshe menne
630	of saraȝynes kenne
	to deþe forte pyne
	þe & alle þyne
	hy gonne me asayly
	swerd me nolde fayly
635	y smot hem alle to grounde
	in a lutel stounde
	þe heued ich þe brynge
	of þe maister kynge
	nou haue ich þe ȝolde
640	þat þou me knyhten woldest
	þe day bigon to springe
	þe kyng rod on hontynge
	to þe wode wyde
	ant ffykenyld bi is syde
645	þat fals wes ant vntrewe
	whose him wel yknewe
	Horn ne þohte nout him on
	ant to boure wes ygon
	he fond rymenild sittynde
650	& wel sore wepynde
	so whyt so þe sonne
	mid terres al byronne
	Horn seide luef þyn ore
	why wepest þou so sore
655	hue seide ich nout ne wepe
	ah yshal er yslepe
	me þohte omy metyng
	þat ich rod ofysshyng
	to see my net ycaste
660	ant wel fer hit laste
	a gret fyssh ate þe ferste
	my net made berste
	þat fyssh me so bycahte
	þat y nout ne lahte
665	ywene yshal forleose
	þe fyssh þat ywolde cheose
	crist & seinte steuene
	quoþ horn areche þy sweuene
	no shal y þe byswyke
670	ne do þat þe mis lyke
	ich take þe myn owe
	to holde & eke to knowe
	for eueruch oþer wyhte
	þerto my trouþe yplyhte
675	wel muche was þe reuþe
	þat wes at þilke treuþe
	rymenild wep wel ylle
	ant horn let terres stille
	Lemmon quoþ he dere
680	þou shalt more y here
	þy sweuen shal wende
	summon vs wole shende
	þat fyssh þat brac þy net
	ywis it is sumwet
685	þat wol vs do sum tene
	ywys hit worþ ysene
	Aylmer rod by stoure
	ant horn wes yne boure
	ffykenyld hade enuye
690	& seyde þeose folye
	Aylmer ich þe werne
	horn þe wole forberne
	Ich herde wher he seyde
	ant his suerd he leyde
695	to brynge þe of lyue
	ant take rymenyld to wyue
	He lyht nou in boure
	vnder couertoure
	by rymenyld þy dohter
700	ant so he doþ wel ofte
	do him out of londe
	er he do more shonde
	Aylmer gan hom turne
	wel mody & wel sturne
705	he fond horn vnder arme
	in rymenyldes barme
	go out quoþ aylmer þe kyng
	Horn þou foule fundlyng
	forþ out of boures flore
710	for rymenild þin hore
	wend out of londe sone
	her nast þou nout to done
	wel sone bote þou flette
	myd suert yshal þe sette
715	Horn eode to stable
	wel modi for þat fable
	he sette sadel on stede
	wiþ armes he gon him shrede
	his brunie he con lace
720	so he shulde in to place
	his suerd he gon fonge
	ne stod he nout to longe
	to is suerd he gon teon
	ne durste non wel him seon
725	He seide lemmon derlyng
	nou þou hauest þy sweuenyng
	þe fyssh þat þyn net rende
	from þe me he sende
	þe kyng wiþ me gynneþ striue
730	a wey he wole me dryue
	þare fore haue nou godneday
	nou y mot founde & fare away
	In to vncouþe londe
	wel more forte fonde
735	yshal wonie þere
	fulle seue ȝere
	at þe seueȝeres ende
	ȝyf y ne come ne sende
	tac þou hosebonde
740	forme þat þou no wonde
	In armes þou me fonge
	ant cus me swyþe longe
	hy custen hem astounde
	& rymenyld fel to grounde
745	Horn toc his leue
	he myhte nout byleue
	He toc Aþulf is fere
	aboute þe swere
	ant seide knyht so trewe
750	kep wel my loue newe
	þou neuer ne forsoke
	rymenild to kepe ant loke
	his stede he bigan stryde
	ant forþ he con hym ryde
755	Aþulf wep wiþ eyȝen
	ant alle þat hit yseyȝen
	Horn forþ him ferde
	a god ship he him herde
	þat him shulde passe
760	out of westnesse
	þe wynd bigon to stonde
	ant drof hem vp olonde
	to londe þat hy fletten
	fot out of ship hy setten
765	he fond bi þe weye
	kynges sones tueye
	þat on wes hoten Aþyld
	ant þat oþer beryld
	beryld hym con preye
770	þat he shulde seye
	what he wolde þere
	ant what ys nome were
	Godmod he seiþ ich hote
	ycomen out of þis bote
775	wel fer from by weste
	to seche myne beste
	beryld con ner him ryde
	ant toc him bi þe bridel
	wel be þou knyht yfounde
780	wiþ me þou lef astounde
	al so ich mote sterue
	þe kyng þou shalt serue
	ne seh y neuer alyue
	so feir knyht her aryue
785	godmod he ladde to halle
	ant he adoun gan falle
	Ant sette him a knelyng
	ant grette þene gode kyng
	þo saide beryld wel sone
790	kyng wiþ him þou ast done
	þilond tac him to werie
	ne shal þe nomon derye
	for he is þe feyreste man
	þat euer in þis londe cam
795	þo seide þe kyng wel dere
	welcome be þou here
	go beryld wel swyþe
	& make hym wel blyþe
	ant when þou farest to wowen
800	tac him þine glouen
	þer þou hast munt to wyue
	a wey he shal þe dryue
	for godmodes feyrhede
	shalt þou no wer spede
805	hit wes at cristesmasse
	nouþer more no lasse
	þe kyng made feste
	of his knyhtes beste
	þer com in at none
810	a geaunt suyþe sone
	y armed of paynyme
	ant seide þise ryme
	site kyng bi kynge
	ant herkne my tidynge
815	her bueþ paynes aryue
	wel more þen fyue
	her beþ vpon honde
	kyng in þine londe
	on þer of wol fyhte
820	to ȝeynes þre knyhtes
	ȝef oure þre sleh ure on
	we shulen of ore londe gon
	ȝef vre on sleh oure þre
	al þis lond shal vre be
825	to morewe shal be þe fyhtynge
	at þe sonne vpspringe
	þo seyde þe kyng þurston
	godmod shal be þat on
	beryld shal be þat oþer
830	þe þridde Aþyld is broþer
	for hue bueþ strongeste
	ant in armes þe beste
	ah wat shal vs to rede
	y wene we bueþ dede
835	Godmod set at borde
	ant seide þeose wordes
	sire kyng nis no ryhte
	on wiþ þre fyhte
	aȝeynes one hounde
840	þre cristene to founde
	ah kyng yshal alone
	wiþ oute more ymone
	wiþ my suerd ful eþe
	bringen hem alle to deþe
845	þe kyng aros amorewe
	he hade muche sorewe
	godmod ros of bedde
	wiþ armes he him shredde
	his brunye he on caste
850	& knutte hit wel faste
	ant com him to þe kynge
	at his vp rysynge
	kyng quoþ he com to felde
	me forte byhelde
855	hou we shule flyten
	ant to gedere smiten
	riht at prime tide
	hy gonnen out to ryde
	hy founden in a grene
860	a geaunt swyþe kene
	his feren him biside
	þat day forto abyde
	Godmod hem gon asaylen
	nolde he nout faylen
865	He ȝef duntes ynowe
	þe payen fel yswowe
	ys feren gonnen hem wiþ drawe
	for huere maister wes neh slawe
	he seide knyht þou reste
870	a whyle ȝef þe leste
	y ne heuede ner of monnes hond
	so harde duntes in non lond
	bote of þe kyng Murry
	þat wes swiþe sturdy
875	he wes of hornes kenne
	y sloh him in sudenne
	Godmod him gon agryse
	ant his blod aryse
	byforen him he seh stonde
880	þat drof him out of londe
	ant fader his aquelde
	he smot him vnder shelde
	he lokede on is rynge
	ant þohte o rymenild þe ȝynge
885	mid god suerd at þe furste
	he smot him þourh þe huerte
	þe payns bigonne to fleon
	ant to huere shype teon
	to ship hue wolden erne
890	godmod hem con werne
	þe kynges sones tweyne
	þe paiens slowe beyne
	þo wes Godmod swyþe wo
	ant þe payens he smot so
895	þat in a lutel stounde
	þe paiens hy felle to grounde
	godmod ant is men
	slowe þe payenes eueruchen
	his fader deþ & ys lond
900	awrek godmod wiþ his hond
	þe kyng wiþ reuþful chere
	lette leggen is sones on bere
	ant bringen hom to halle
	muche sorewe hue maden alle
905	in a chirche of lym & ston
	me buriede hem wiþ ryche won
	þe kyng lette forþ calle
	hise knyhtes alle
	ant seide godmod ȝef þou nere
910	alle ded we were
	þou art boþe god & feyr
	her ymake þe myn heyr
	for my sones bueþ yslawe
	ant ybroht of lyf dawe
915	dohter ich habbe one
	nys non so feyr of blod ant bone
	Ermenild þat feyre may
	bryht so eny someres day
	hire wolle ich ȝeue þe
920	ant her kyng shalt þou be
	he seyde more ichul þe serue
	kyng er þen þou sterue
	when y þy dohter ȝerne
	heo ne shal me noþyng werne
925	godmod wonede þere
	fulle six ȝere
	ant þe seueþe ȝer bygon
	to rymynyld sonde ne sende he non
	rymenyld wes in westnesse
930	wiþ muchel sorewenesse
	a kyng þer wes aryue
	ant wolde hyre han to wyue
	at one were þe kynges
	of þat weddynge
935	þe dayes were so sherte
	ant rymenild ne derste
	latten on none wyse
	a wryt hue dude deuyse
	Aþulf hit dude wryte
940	þat horn ne louede nout lyte
	hue sende hire sonde
	in to eueruche londe
	to sechen horn knyhte
	wher so er me myhte
945	Horn þer of nout herde
	til o day þat he ferde
	to wode forte shete
	a page he gan mete
	Horn seide leue fere
950	whet dest þou nou here
	Sire in lutel spelle
	y may þe sone telle
	Ich seche from westnesse
	horn knyht of estnesse
955	ffor rymenild þat feyre may
	soreweþ for him nyht & day
	A kyng hire shal wedde
	a sonneday to bedde
	Kyng Mody of reynis
960	þat is hornes enimis
	ich habbe walked wyde
	by þe see side
	ne mihte ich him neuer cleche
	wiþ nones kunnes speche
965	ne may ich of him here
	in londe fer no nere
	wey la wey þe while
	him may hente gyle
	Horn hit herde wiþ earen
970	ant spec wiþ wete tearen
	so wel grom þe bitide
	horn stond by þi syde
	aȝeyn to rymenild turne
	& sey þat hue ne murne
975	yshal be þer bitime
	a sonneday er prime
	þe page wes wel blyþe
	& shipede wel suyþe
	þe see him gon adrynke
980	þat rymenil may ofþinke
	þe see him con ded þrowe
	vnder hire chambre wowe
	rymenild lokede wide
	by þe see syde
985	ȝef heo feȝe horn come
	oþer tidynge of eny gome
	þo fond hue hire fonde
	adronque by þe stronde
	þat shulde horn brynge
990	hire hondes gon hue wrynge
	Horn com to þurston þe kynge
	ant tolde him þes tidynge
	ant þo he was biknowe
	þat rymenild wes ys owe
995	ant of his gode kenne
	þe kyng of sudenne
	ant hou he sloh afelde
	him þat is fader aquelde
	ant seide Kyng so wyse
1000	ȝeld me my seruice
	rymenild help me to wynne
	swyþe þat þou ne blynne
	ant yshal do to house
	þy dohter wel to spouse
1005	for hue shal to spouse haue
	Aþulf my gode felawe
	he is knyht mid þe beste
	& on of þe treweste
	þe kyng seide so stille
1010	horn do al þi wille
	he sende þo by sonde
	ȝend al is londe
	after knyhtes to fyhte
	þat were men so lyhte
1015	to him come ynowe
	þat in to shipe drowe
	Horn dude him in þe weye
	in a gret galeye
	þe wynd bi gon to blowe
1020	in a lutel þrowe
	þe see bi gan wiþ ship to gon
	to westnesse hem brohte anon
	hue striken seyl of maste
	ant ancre gonnen caste
1025	matynes were yronge
	& þe masse ysonge
	of rymenild þe ȝynge
	& of Mody þe kynge
	ant horn wes in watere
1030	ne mihte he come no latere
	he let is ship stonde
	ant com him vp to londe
	his folk he made abyde
	vnder a wode fyde
1035	Horn eode forh al one
	so he sprong of þe stone
	en palmere he y mette
	& wiþ wordes hyne grette
	palmere þou shalt me telle
1040	he seyde of þine spelle
	so brouke þou þi croune
	why comest þou from toune
	ant he seide on is tale
	y come from a brudale
1045	from brudale wylde
	of maide remenylde
	ne mihte hue nout dreȝe
	þat hue ne wep wiþ eȝe
	hue seide þat hue nolde
1050	be spoused wiþ golde
	hue hade hosebonde
	þah he were out of londe
	ich wes in þe halle
	wiþ inne þe castel walle
1055	a wey ygon glide
	þe dole ynolde abyde
	þer worþ a dole reuly
	þe brude wepeþ bitterly
	quoþ horn so crist me rede
1060	we wolleþ chaunge wede
	tac þou robe myne
	ant ȝe sclaueyn þyne
	To day yshal þer drynke
	þat summe hit shal of þynke
1065	sclaueyn he gon doun legge
	& horn hit dude on rugge
	ant toc hornes cloþes
	þat nout him were loþe
	horn toc bordoun & scrippe
1070	ant gan to wrynge is lippe
	he made foule chere
	& bicollede is swere
	he com to þe ȝateward
	þat him onsuerede froward
1075	horn bed vn do wel softe
	moni tyme ant ofte
	ne myhte he ywynne
	forto come þer ynne
	horn þe wyket puste
1080	þat hit open fluste
	þe porter shulde abugge
	he þrew him a doun þe brugge
	þat þre ribbes crakede
	horn to halle rakede
1085	ant sette him doun wel lowe
	in þe beggeres rowe
	he lokede aboute
	myd is collede snoute
	þer seh he rymenild sitte
1090	ase hue were out of wytte
	wepinde sore
	ah he seh nower þore
	Aþulf is gode felawe
	þat trewe wes in vch plawe
1095	aþulf wes o tour ful heh
	to loke fer & eke neh
	after hornes comynge
	ȝef water him wolde brynge
	þe see he seh flowe
1100	ah horn nower rowe
	he feyde on is songe
	horn þou art to longe
	Rymenild þou me bitoke
	þat ich hire shulde loke
1105	Ich haue yloked euere
	& þou ne comest neuere
	Rymenild ros of benche
	þe br al forte shenche
	after mete in sale
1110	boþe wyn & ale
	an horn hue ber an honde
	for þat wes lawe of londe
	hue dronc of þe bre
	to knyht & skyere
1115	horn set at grounde
	him þohte he wes ybounde
	he seide quene so hende
	to me hydeward þou wende
	þou shenh vs wiþ þe vurste
1120	þe beggares bueþ afurste
	hyre horn hue leyde a doune
	ant fulde him of þe broune
	a bolle of a galoun
	hue wende he were a glotoun
1125	hue seide tac þe coppe
	ant drync þis ber al vppe
	ne seh y neuer y wene
	beggare so kene
	horn toc hit hise yfere
1130	& seide quene so dere
	no br nullich ibite
	bote of coppe white
	þou wenest ich be a beggere
	ywis icham a fysshere
1135	wel fer come by weste
	to seche mine beste
	Min net lyht her wel hende
	wiþ inne a wel feyr pende
	Ich haue leye þere
1140	nou is þis þe seueþe ȝere
	Icham icome to loke
	ȝef eny fyssh hit toke
	ȝef eny fyssh is þer inne
	þer of þou shalt wynne
1145	ffor icham come to fyssh
	drynke nully of dyssh
	drynke to horn of horne
	wel fer ich haue y orne
	Rymenild him gan bihelde
1150	hire herte fel to kelde
	ne kneu hue noht is fysshyng
	ne him selue noþyng
	ah wonder hyre gan þynke
	why for horn he bed drynke
1155	hue fulde þe horn of wyne
	ant dronke to þat pelryne
	hue seide drync þi felle
	& seþþen þou me telle
	ȝef þou horn euer seȝe
1160	vnder wode leȝe
	Horn dronc of horn astounde
	ant þreu is ryng to grounde
	ant seide quene þou þench
	what y þreu in þe drench
1165	þe quene eode to boure
	mid hire maidnes foure
	hue fond þat hue wolde
	þe ryng ygraued of golde
	þat horn of hyre hedde
1170	fol sore hyre adredde
	þat horn ded were
	for his ryng was þere
	þo sende hue a damoisele
	after þilke palmere
1175	palmere quoþ hue so trewe
	þe ryng þat þou yn þrewe
	þou sey wer þou hit nome
	ant hyder hou þou come
	he seyde by seint gyle
1180	ich eode mony a myle
	wel fer ȝent by weste
	to seche myne beste
	Mi mete forte bydde
	for so me þo bitidde
1185	ich fond horn knyht stonde
	to shipeward at stronde
	he seide he wolde gesse
	to aryue at westnesse
	þe ship nom in to flode
1190	wiþ me & horn þe gode
	Horn by gan be sek & deȝe
	& for his loue me preȝe
	to gon wiþ þe rynge
	to rymenild þe ȝynge
1195	wel ofte he hyne keste
	crist ȝeue is soule reste
	Rymenild seide at þe firste
	herte nou to berste
	horn worþ þe no more
1200	þat haueþ þe pyned sore
	Hue fel adoun a bedde
	ant after knyues gredde
	to slein mide hire kyng loþe
	& hire selue boþe
1205	wiþ inne þilke nyhte
	come ȝef horn ne myhte
	to herte knyf hue sette
	horn in is armes hire kepte
	his shurte lappe he gan take
1210	& wypede a wey þe foule blake
	þat wes opon his suere
	ant seide luef so dere
	ne const þou me yknowe
	ne am ich horn þyn owe
1215	Ich horn of westnesse
	in armes þou me kesse
	yclupten & kyste
	so longe so hem lyste
	Rymenild quoþ he ich wende
1220	doun to þe wodesende
	for þer bueþ myne knyhte
	worþi men & lyhte
	armed vnder cloþe
	hue shule make wroþe
1225	þe kyng & hise gestes
	þat bueþ at þise festes
	to day ychulle huem cacche
	nou ichulle huem vacche
	Horn sprong out of halle
1230	ys brunie he let falle
	rymenild eode of boure
	aþulf hue fond loure
	aþulf be wel blyþe
	& to horn go swyþe
1235	he is vnder wode bowe
	wiþ felawes ynowe
	Aþulf gon forth springe
	for þat ilke tydynge
	efter horn he ernde
1240	him þohte is herte bernde
	he oftok him ywisse
	ant custe him wiþ blysse
	Horn tok is preye
	ant dude him in þe weye
1245	hue comen in wel sone
	þe ȝates weren vndone
	y armed suiþe þicke
	from fote to þe nycke
	alle þat þer euere weren
1250	wiþ oute is trewe feren
	ant þe kyng aylmare
	ywis he hade muche care
	monie þat þer sete
	hure lyf hy gonne lete
1255	Horn vnderftondyng ne hede
	of ffykeles falffede
	hue fuoren alle ant feyde
	þat hure non him wreyede
	ant fuore oþes holde
1260	þat huere non ne sholde
	Horn neuer bytreye
	þah he on deþe leye
	þer hy ronge þe belle
	þat wedlak to fulfulle
1265	hue wenden hom wiþ eyfe
	to þe kynges paleyfe
	þer wes þe brudale fuete
	for richemen þer ete
	telle ne mihte no tonge
1270	þe gle þat þer was fonge
	Horn fet in chayere
	& bed hem alle yhere
	he feyde kyng of londe
	mi tale þou vnderftonde
1275	Ich wes ybore in sudenne
	kyng wes mi fader of kenne
	þou me to knyhte houe
	of knythod habbe y proue
	þou dryue me out of þi lond
1280	& feydeft ich wes traytour strong
	þou wendeft þat ich wrohte
	þat y ner ne þohte
	by rymenild forte lygge
	ywys ich hit wiþ fugge
1285	Ne shal ich hit ner agynne
	er ich fudenne wynne
	þou kep hyre me aftounde
	þe while þat ich founde
	In to myn heritage
1290	wiþ þis yrisshe page
	þat lond ichulle þorhreche
	& do mi fader wreche
	ychul be kyng of toune
	& lerne kynges roune
1295	þenne shal rymenild þe ȝynge
	ligge by horn þe kynge
	Horn gan to shipe drawe
	wiþ hyse yrisshe felawe
	Aþulf wiþ him his broþer
1300	he nolde habbe non oþer
	þe ship by gan to croude
	þe wynd bleu wel loude
	wyþ inne dawes fyue
	þe ship bigan aryue
1305	vnder sudennes side
	huere ship by gon to ryde
	aboute þe midnyhte
	horn eode wel rihte
	he nom aþulf by honde
1310	& ede vp to londe
	hue fonden vnder shelde
	a knyht liggynde on felde
	oþe shelde wes ydrawe
	a croyȝ of ihesu cristes lawe
1315	þe knyht him lay on slape
	in armes wel yshape
	Horn him gan ytake
	& seide knyht awake
	þou sei me whet þou kepest
1320	& here whi þou slepest
	me þuncheþ by crois liste
	þat þou leuest on criste
	bote þou hit wolle shewe
	my suerd shal þe to hewe
1325	þe gode knyht vp aros
	of hornes wordes him agros
	he seide ich seruy ille
	paynes to ȝeynes mi wille
	Ich was cristene sumwhile
1330	ycome in to þis yle
	saraȝyns loþe & blake
	me made ihesu forsake
	to loke þis passage
	for horn þat is of age
1335	þat woneþ her by weste
	god knyht mid þe beste
	hue slowe mid huere honde
	þe kyng of þisse londe
	ant wiþ him mony honder
1340	þer fore me þuncheþ wonder
	þat he ne comeþ to fyhte
	god ȝeue him þe myhte
	þat wynd him hider dryue
	to don hem alle of lyue
1345	ant slowen kyng mury
	hornes cunesmon hardy
	horn of londe hue senten
	tuelf children wiþ him wenten
	wiþ hem wes aþulf þe gode
1350	mi child myn oune fode
	ȝef horn is hol ant sounde
	aþulf tit no wounde
	he louede horn wiþ mihte
	& he him wiþ ryhte
1355	ȝef y myhte se hem tueye
	þenne ne rohti forte deye
	knyht be þenne blyþe
	mest of alle syþe
	Aþulf & horn is fere
1360	boþe we beþ here
	Þe knyht to horn gan skippe
	& in his armes clippe
	Muche ioye hue maden yfere
	þo hue to gedere y come were
1365	He saide wiþ steuene þare
	ȝungemen hou habbe ȝe ȝore yfare
	wolle ȝe þis lond wynne
	& wonie þer ynne
	he seide suete horn child
1370	ȝet lyueþ þy moder godyld
	of ioie hue ne miste
	o lyue ȝef hue þe wiste
	horn seide on is ryme
	yblessed be þe time
1375	Icham icome in to sudenne
	wiþ fele yrisshemenne
	we shule þe houndes kecche
	& to þe deȝe vecche
	ant so we shulen hem teche
1380	to speken oure speche
	Horn gon is horn blowe
	is folk hit con yknowe
	hue comen out of hurne
	to horn swyþe ȝurne
1385	hue smiten & hue fyhten
	þe niht & eke þe ohtoun
	þe saraȝyns hue slowe
	ant summe quike to drowe
	mid speres ord hue stonge
1390	þe olde & eke þe ȝonge
	horn lette sone wurche
	boþe chapel & chyrche
	he made belle rynge
	ant prestes masse synge
1395	he sohte is moder halle
	in þe roche walle
	he custe hire ant grette
	ant in to þe castel fette
	Croune he gan werie
1400	ant make feste merye
	Murie he þer wrohte
	ah Rymenild hit abohte
	þe whiles horn wes oute
	ffikenild ferde aboute
1405	þe betere forte spede
	þe riche he ȝef mede
	boþe ȝonge ant olde
	wiþ him forte holde
	ston he dude lade
1410	ant lym þerto he made
	Castel he made sette
	wiþ water by flette
	þat þer yn come ne myhte
	bote foul wiþ flyhte
1415	bote when þe see wiþ drowe
	þer mihte come ynowe
	þus fykenild gon by wende
	Rymenild forte shende
	to wyue he gan hire ȝerne
1420	þe kyng ne durst him werne
	ant habbeþ set þe day
	ffykenild to wedde þe may
	wo was rymenild of mode
	terres hue wepte of blode
1425	þilke nyht horn suete
	con wel harde mete
	of rymenild his make
	þat in to shipe wes take
	þe ship gon ouerblenche
1430	is lemmon shulde adrenche
	Rymenild mid hire honde
	swymme wolde to londe
	ffykenild aȝeyn hire pylte
	mid his suerdes hylte
1435	Horn awek in is bed
	of his lemmon he wes adred
	Aþulf he seide felawe
	to shipe nou we drawe
	ffykenild me haþ gon vnder
1440	ant do rymenild sum wonder
	Crist for his wondes fyue
	to nyht þider vs dryue
	Horn gon to shipe ride
	his knyhtes bi his side
1445	þe ship bigon to sture
	wiþ wynd god of cure
	ant fykenild her þe day springe
	ferde to þe kynge
	After rymenild þe brhyte
1450	ant spousede hyre by nyhte
	he ladde hire by derke
	in to is newe werke
	þe feste hue bigonne
	er þen aryse þe sonne
1455	Hornes ship atstod in stoure
	vnder fykenildes boure
	Nuste Horn alyue
	wher he wes aryue
	þene castel hue ne knewe
1460	for he was so newe
	þe see bigon to wiþ drawe
	þo seh horn his felawe
	þe feyre knyht arnoldyn
	þat wes aþulfes cosyn
1465	þat þer set in þat tyde
	kyng horn to abide
	he seide kyng horn kyngessone
	hider þou art welcome
	to day haþ sire ffykenild
1470	yweddeþ þi wif rymenild
	white þe nou þis while
	he haueþ do þe gyle
	þis tour he dude make
	al for rymenildes sake
1475	ne may þer comen ynne
	no mon wiþ no gynne
	Horn nou crist þe wisse
	rymenild þat þou ne misse
	Horn couþe alle þe listes
1480	þat eni mon of wiste
	harpe he gon shewe
	ant toc him to felawe
	knyhtes of þe beste
	þat he euer hede of weste
1485	ouen o þe sherte
	hue gurden huem wiþ suerde
	hue eoden on þe grauele
	towart þe castele
	hue gonne murie singe
1490	& makeden huere gleynge
	þat fykenild mihte y here
	he axede who hit were
	men seide hit were harperis
	iogelers ant fyþelers
1495	hem me dude in lete
	at halle dore hue sete
	horn sette him abenche
	is harpe he gan clenche
	he made rymenild a lay
1500	ant hue seide weylaway
	Rymenild fel yswowe
	þo nes þer non þat lowe
	hit smot horn to herte
	sore con him smerte
1505	he lokede on is rynge
	ant o rymenild þe ȝynge
	he eode vp to borde
	mid his gode suorde
	ffykenildes croune
1510	he fel þer adoune
	ant alle is men arowe
	he dude adoun þrowe
	ant made arnoldyn kyng þere
	after kyng Aylmere
1515	to be kyng of Westnesse
	for his mildenesse
	þe kyng ant is baronage
	ȝeuen him truage
	Horn toc rymenild by honde
1520	ant ladde hire to stronde
	ant toc wiþ him Aþelbrus
	þe gode stiward of hire fader hous
	þe see bigan to flowen
	ant hy faste to rowen
1525	hue aryueden vnder reme
	in a wel seyr streme
	kyng Mody wes kyng in þat lond
	þat horn sloh wiþ is hond
	Aþelbrus he made þer kyng
1530	for his gode techyng
	for sire hornes lore
	he wes mad kyng þore
	Horn eode to ryue
	þe wynd him con wel dryue
1535	he aryuede in yrlonde
	þer horn wo couþe er fonde
	he made þer Aþulf chyld
	wedde mayden ermenyld
	ant horn com to sudenne
1540	to is oune kenne
	Rymenild he made þer is quene
	so hit myhte bene
	In trewe loue hue lyueden ay
	ant wel hue loueden godes lay
1545	Nou hue beoþ boþe dede
	crist to heouene vs lede AmeN.